И.Н.Жирков аатынан Дүпсүн орто оскуолатын иһинэн, кэрэ айылҕалаах Дабаадыма учаастагын Бэс күөлүгэр «Кустук» оҕо сынньалаҥын киинэ иккис сезоҥҥа от ыйын 1 күнүттэн оҕолору үөрэ көрүстэ. Улуус 8 оскуолаларыттан барыта 20 оҕо кэлэн «МикроАрдуино» техническэй хайысхалаах лааҕырга дьарыктанабыт, үөрэнэбит, сайыҥҥы сынньалаҥмытын туһалаахтык атаарабыт.
Лааҕыр үлэтин салайааччыта оскуола учуутала Ольга Федоровна Протопопова үлэлиир, иитээччилэринэн улуустааҕы «Өркөн” оҕону эбии үөрэхтээһин киинин эдэр педагогтара Иван Алексеевич Иванов, Максим Александрович Свинобоев ыыталлар уонна Дьокуускайдааҕы педагогическай колледж адаптивнай физкультура салаатын устудьуона Михаил Жирков практикатын бара сылдьар. Оскуолабыт повара Аксинья Афанасьевна Дмитриева уонна фельдшера Сивцева Раиса Васильевна биһигини битэмииннээх аһылыгынан хааччыйаллар, кыһаллан туран үлэлииллэр.
14 күн устата этэрээттэргэ арахсан робототехника, IT үөрүйэхтэригэр дьарыктанабыт, араас хайысхалаах күрэхтэргэ, оонньууларга, хамаанданан үлэҕэ күрэстэһэбит.
От ыйын 4 күнүгэр лааҕыр үөрүүлээх аһыллыытыгар оскуолабыт дириэктэрэ Андрей Дмитриевич Сыроватскай, «Кустук” лааҕыр бырайыагын ааптара, энтузиаст учуутал, педагог-наставник Гаврил Гаврил Сивцев биһиэхэ анаан эҕэрдэ тылларын анаатылар. Кэлбит ыалдьыттарга эҕэрдэ кэнсиэри бэлэхтээтибит. Ити курдук, “Кустук” лааҕырбыт оҕо чуор куолаһынан чугдаарда.
Айсилена Соловьева, VI кылаас Дүпсүн орто оскуолата, Уус Алдан.