Бэс ыйын 2 күнүгэр Өрөспүүбүлүкэтээҕи «Саха-медиа» конференц-саалатыгар бу соторунан саҕаланаары турар «Спортивные Якутяне» үөрэнээччилэр Спартакиадаларын пресс-конференцията буолла. Бу тэрээһиҥҥэ тэрийээччилэр, судьуйалар уонна волонтёрдар формалара, Спартакиада анал сувенирдара, бириистэрэ уонна бигэргэммит логотиба сүрэхтэннэ.
Кыттыыны ыллылар: Саха Өрөспүүбүлүкэтин үөрэҕириитин миниистирин бастакы солбуйааччыта Алевтина Аргунова, Саха Өрөспүүбүлүкэтин спортка уонна физическэй култуураҕа миниистирин солбуйааччыта Гаврил Мохначевский уонна Спартакиада сүрүннүүр судьуйата Александр Брызгалов.
Спартакиада 2023 сыл Бэс ыйын 5-11 күннэригэр Дьокуускай куоракка буолуоҕа. Сүрүн тэрээһиннэрэ Н.Н. Тарскай аатынан «Туймаада» стадиоҥҥа буолуохтара, ону таһынан Өрөспүүбүлүкэбит Спортка уонна физическэй култуураҕа министиэрстибэтин атын спортивнай объектарыгар ыытыллыахтара. Күрэх бары өрөгөйдөөх тэрээһиннэригэр киирии босхо буолуоҕа. Спартакиадаҕа уопсайа 27 спорт көрүҥэ киирдэ, олортон 16 көрүҥ эһиилги сылга ыытыллар «Азия оҕолоро» күрэххэ киирсэллэр. Кыттааччылар түмүктүүр түһүмэххэ 9 спорт көрүҥэр күөн көрсүөхтэрэ.
Тэрийээччилэр сүрүн сорудахтарынан өрөспүүбүлүкэбит оҕолорун спортка уонна физическэй култуураҕа сыһыарыы, дойдубут спортка потенциалын быһаарыы, ону таһынан, 2024 сылга ыытыллар «Азия оҕолоро» ооньууларга өрөспүүбүлүкэ хомуур хамаандатын тэрийии буоларын туһунан иһитиннэрдилэр.
«Спортивные Якутяне» үөрэнээччилэр Спартакиадаларыгар быйыл өрөспүүбүлүкэбит араас улуустарыттан уонна Дьокуускай куораттан 32 хомуур хамаанда (1400 тахса эдэр спортсмен) кыттыыны ылыаҕа. Кыттааччылар чуолкай ахсааннара Бэс ыйын 5 күнүгэр буолар мандатнай хамыыһыйа үлэтин түмүгүнэн быһаарыллыаҕа.
Спартакиада хаамыытын туһунан Бэс ыйын 5 күнүттэн биһиги сайтпытыгар күннэтэ сырдатылла туруоҕа. «Кэскили» кытта бииргэ буолуҥ. Эдэр спортсменнарбытыгар ситиһиини баҕарабыт!
#СпортивныеЯкутяне #ҮөрэнээччилэрСпартакиадалара