“Күөх билим” лабаратория үгэс курдук тэрийэр “Хадаайы күөлэ эрэллээх илиигэ” эбэ уутун харыстыыр сыаллаах хайыһар экологическай десаана муус устар 19 күнүгэр буолла. Ф.М.Охлопков аатынан сынньалаҥ паарка таһыттан, Таатта лиссиэйин оҕо-аймах ыччат дьоно күө-дьаа ким хайыһарынан, ким сатыы Хадаайыга тиийдилэр. Эбэҕэ сиэри ситэрэн, алгыстаах алгысчыт Прасковья Аржакова алаадьынан айах тутта.Оскуола дириэктэрэ И.А.Сивцева, экологияны хонтуруоллуур Таатта инспекциятын начальнига Г.К. Николаев, айылҕаҕа эдэр айанньыт тулуурдаах буолуохтааҕын, айылҕа харыстабыллаах сыһыаны эрэйэрин эттилэр. Күөлгэ баар балыктарга салгыны киллэрии, хайыһарынан сүүрүү, хомуур хапсаҕай, сыал ытыы, салааскаҕа кыыһы олордон барыы күрэхтэр төрөппүттэри кытта көхтөөхтүк ыытылыннылар. Ким бастаабыт, ким хотторбут сибиэһэй сааскы хаардаах күнтэн күүс-уох мунньунан, үөрэ-көтө киэһээҥҥи чэй сэргэх кэпсээнэ буолла.
Сандаара