Муус устар 4 күнүгэр Хаҥалас улууһун Өктөм нэһилиэгэр Билим дьоҕус академиятыгар «КосмоМАНиЯ» сменатын үөрүүлээх арыллыыта буолла. https://vk.com/wall-199463452_6441
Манна өрөспүүбүлүкэ араас улуустарыттан космос куйаарын интэриэһиргиир бастыҥтан бастыҥ оҕолор талыллан кэлбиттэр. Кинилэр уонтан тахса күн устата «Малые Космические аппараты», «Дистанционное зондирование Земли» уонна «Космическая робототехника» диэн үс хайысханан үлэлиэхтэрэ. Бу сменаҕа оҕолору Красноярскайтан М.Ф. Решетнёв аатынан наука уонна технология Сибиирдээҕи государственнай университет космическай аппараттар дьоҕус аппараттарын лабораториятын сэбиэдиссэйин солбуйааччыта Дмитрий Михайлович Зуев үөрэтиэҕэ, билиитин-көрүүтүн үллэстиэҕэ.
Дмитрий Михайлович Зуев эппитин курдук, оҕолор бу сменаҕа 10-ча хонук устата күн аайы космос куйаарын кытта алтыһыахтара, лабораторнай чинчийиилэри, эксперименнэри оҥоруохтара, космос туһунан саҥаны билиэхтэрэ.
«КосмоМАНиЯ» арыллыытыгар Гонконгтан биһиги академиябыт чугас доҕоро, педагогическай наука доктора, Кау Ян ураты дьоҕурдаах оҕолорун үөрэтэр оскуола дириэктэрэ, СӨ Бастакы Президенэ Михаил Ефимович Николаев «Билиигинэн кыайыаҥ» стипендия хаһаайына Патрик Хан Чанг Ламтус бэйэтинэн кэлэн ыалдьыттаата. Кини Саха сиригэр Михаил Ефимович Николаев космоһы үөрэх ситимигэр киллэрбит салайааччы буоларын улаханнык сыаналыырын туһунан эттэ. Бу күн Красноярскайтан М.Ф. Решетнёв аатынан наука уонна технология Сибиирдээҕи государственнай университет проректара Владимир Алексеевич Курешов, космическай техника институтун летальнай аппараттарын кафедратын профессора Вадим Валентинович Кольга куйаар ситимин нөҥүө тахсан, «КосмоМАНиЯ» сменаҕа кэлбит оҕолору эҕэрдэлээтилэр.
«КосмоМАНиЯ» смена арыллыбытынан!
Олег АДАМОВ, X кылаас, I-Хаҥалас, Ньурба.
Хаартыскаҕа түһэрдэ Саша Егоров, VII кылаас, Ороһу, Үөһээ Бүлүү.
Видеону таҥан оҥордо Таатта улууһун
Чымнаайы орто оскуолатын VIII кылааһын үөрэнээччитэ Василена Нестерова.