Олунньу 28 күнүгэр, Танда үрэх сүнньүгэр сытар 4 ыаллыы оскуола алын кылааһын үөрэнээччилэрин икки ардыларыгар үгэскэ кубулуйбут «Патриот — 2023» байыаннай-спортивнай күрэх 9 төгүлүн ыытылынна. Күрэх Д.Д. Оллонов аатынан Түүлээх орто оскуолатын алын кылааһын учуутала Винокурова Елена Михайловна бырайыагынан сыллата ааптар тэрийэр оскуолатыгар ыытыллар.
Күрэххэ строевой хаамыы, 6 этаптаах военизированнай эстафета, маны таһынан санитардар күрэхтэрэ, Калашников автоматы ыһыы уонна хомуйуу, пневматиканан ытыы, гранатанан сыал быраҕыы, канат тардыһыытын көрүҥнэрэ киирэллэр. Военизированнай эстафетаҕа байыастар марш-бросок, ботуруону магазиныгар хаалааһын, мэһэйдэрдээх сүүрүү, снарядтаах дьааһыгы туоратыы, хайыһар десана, былаахтаах сүүрүү көрүҥнэрин ааһаллар.
Быйыл Түүлээхтэн «Звезда», Тандаттан «Орлан», Тиит-Арыыттан «Дьулуур», Бээрийэттэн «Соколы России» диэн хамаандалар 7-лии байыастаах күрэхтэстилэр. Хамаандалар бука бары үчүгэй бэлэмнээх кэлэн күөн көрүстүлэр.
Күрэх түмүгүнэн «Лучший командир» — Кузьмин Айсар (Түүлээх), «Лучший санитар» — Аммосова Карина (Танда), «Меткий стрелок» — Дьяконов Валера (Тиит-Арыы), «Юный армеец» — Васильев Айдын (Бээрийэ), «Знаток автомата» — Самсонов Алексан (Түүлээх) диэн анал ааттары сүктүлэр. Уопсай түмүккэ «Звезда» бастакы, «Орлан» иккис, «Дьулуур» үһүс миэстэлэри ылан грамотанан, мэтээлинэн наҕараадаланнылар. Кыайыылаах «Звезда» хамаанда көһөрүллэ сылдьар кубогы ылар чиэстэннэ.
Биһиги оскуолабыт «Орлан» хамаандатын эдэр армеецтара күрэххэ ситиһиилээхтик кытынныбыт. Бу күрэхтэн оҕолор байыаннай элбэх көрүҥү билэн кэллибит, тэҥ саастыылаахтарбытын кытта эт-хаан чөл туруктаах буолуутугар тургутугу аастыбыт.
Бырайыак ааптара Винокурова Елена Михайловна ыччаты патриотическай тыыҥҥа иитиигэ кэскиллээх үлэтэ өссө кэҥии, тэтимирэ турарыгар баҕа санаабытын тиэрдэбит. «Патриот» күрэҕи оҥкул оҥостон, оҕолор дойдубутугар, норуоппутугар бэриниилээх дьон буола үүнэн-сайдан тахсыахпыт диэн эрэллээхпит.
Д.Д. Оллонов аатынан Түүлээх орто оскуолатын коллективыгар «Патриот» күрэҕи үрдүк таһымҥа тэрийэн ыыппытыгар махтал тылларын аныыбыт. Айымньылаах, кэскиллээх үлэҕитигэр ситиһиилэри баҕарабыт.
Аммосова Карина, Танда орто оскуолатын 3 кылааһын үөрэнээччитэ, Уус Алдан.