Ааспыт сыл ыам ыйын 19 күнүгэр, Бүтүн Сойуустааҕы пионерскай хамсааһын тэриллибитэ өрөгөйдөөх 100 сылын туолбута.
Бу күн 1922 сыллаахха Хомсомуол бүтүн Арассыыйатааҕы II кэмпириэнсийэтигэр дойду үрдүнэн пионердар этэрээттэрин тэрийэр туһунан быһаарыныы ылыллыбыта уонна 1991 сыл Сойуус ыһыллыар диэри бэлиэтэммитэ.
200 мөлүйүөнтэн тахса 10-14 саастаах оҕолор пионер буола сылдьыбыттара биллэр. Оттон пионер оҕолору түмэ тардан кыһамньылаах уонна сатабыллаах үлэни тэрийбит, биир санаанан салайтаран үгүс үтүө хамсааһыны саҕалаабыт дьонунан баһаатайдар буолаллара. Пионерскай хамсааһын бэтэрээннэрэ, Убайаан оскуолатыгар өр кэмҥэ баһаатайынан, история учууталынан үлэлээбит Арассыыйа үөрэҕириитин туйгуна, Учууталлар учууталлара, учууталлар уонна общественность XI-c сийиэстэрин дэлэгээтэ Розалия Софроновна Бушкова уонна Ньурбатааҕы детдомҥа баһаатайдаабыт СӨ социальнай эйгэтин үтүөлээх үлэһитэ, Ньурба улууһун бочуоттаах олохтооҕо Валентина Никифоровна Котоконова Пионерия 100 сылыгар анаан таһааттарбыт «Пионерия умнуллубат сырдык өйдөбүллэрэ» кинигэлэрэ тохсунньу 26 күнүгэр Ф.Г.Сафронов аатынан Киин бибилэтиэкэ ааҕар саалатыгар сүрэхтэммитэ.
Ньурбаҕа баар “Тупсарт” полиграфическай өҥө кыһатын салайааччыта Саргылана Николаевна Прокопьева «Пионерия умнуллубат сырдык өйдөбүллэрэ» кинигэ дизайнын оҥорон, улахан форматтаах глянцевай кумааҕыга бэччээттэтэн таһаарбыта олус тупсаҕай көрүҥнээх. Бу кинигэ күн сирин көрөрүгэр Ньурба оройуонун дьаһалтатын баһылыга Алексей Михайлович Иннокентьев көмө-тирэх буолбут. Кинигэҕэ 70-80 сылларга Убайаан оскуолатын маҥнайгы космонавт Ю.А. Гагарин аатынан пионерскай дружинаҕа үлэлээн ааспыт пионер баһаатайдар, ол кэминээҕи пионердар 41 ахтыылара, пионерия историятын сырдатар үгүс сэдэх хаартыскалар хомуллан киирбиттэр.
Кинигэ киирии тылын «Ньурба эрэлэ» оҕо общественнай тэрилтэтин үрдүк категориялаах педагог – тэрийээччитэ, Российскай Федерация уопсай үөрэхтээһинин Бочуоттаах үлэһитэ, “Дети Саха-Азия” Аан дойдутааҕы оҕо фондатын лауреата, Саха Өрөспүүбүлүкэтин учууталларын учууталлара Давыдова Валентина Яковлевна суруйбут.
Бибилэтиэкэ ааҕар саалатыгар Убайаан орто оскуолатын музейын Пионерия туһунан кинигэлэрэ, атрибуттара, Юрий Алексеевич Гагарин аатынан дружина фотоальбомнара, араас матырыйааллара көрдөрүүгэ туруоруллубуттара. Ааптардар пионер баһаатайынан үлэлээбит кэмнэрин, пионердарын, кинигэ матырыйаалын хомуйааһыҥҥа хайдах үлэлээбиттэрин ахтан — санаан ааспыттара. Кинигэ сүрэхтэниитигэр кэлбит ыалдьыттар баҕа санааларын эппиттэрэ, эҕэрдэлээбиттэрэ, сэмэй бэлэхтэрин туттарбыттара.
Ушканов Ф.Ф. салайааччылаах Ньурба оройуонун үөрэҕирии салаатын аатыттан Прокопьева В.В. «За вклад в развитие образование района» диэн аан бастакытын туттарыллар бэлиэни кинигэни таһаарбыт Розалия Софроновнаҕа, Валентина Никифоровнаҕа туттарбыта. Салгыы пионер сылларын, кинигэ туһунан санааларын Иккис Хаҥалас, Чаппанда оскуолаларыгар старшай пионер-баһаатыйынан, 1992 сылтан дьаһалта специалиһынан үлэлээн кэлбит, билигин Чаппандатааҕы Николай Тарасович Степанов аатынан литературнай түмэл салайааччытынан үлэлиир Сидорова Т.Д., Ньурбатааҕы кырдьаҕастар дьиэлэрин салайааччыта Семенова И.Ф., пионер хамсааһынын бэтэрээнэ, уус-уран самодеятельность сайдыытыгар бэйэтин кылаатын уурбут, СӨ үөрэҕириитин туйгуна Никифоров В.А., пионер хамсааһынын бэтэрээнэ, СӨ үөрэҕириитин туйгуна, методист-баһаатай, Антоновка орто оскуолатын учуутала Егорова С.В., СӨ култууратын туйгуна Чиряева П.М., СӨ үөрэҕириитин туйгуна, Убайаан алын сүһүөх оскуолатын учуутала Михайлова-Федорова К.С., Антоновка орто оскуолатын педагог-тэрийээччитэ Захарова П.М., Ю.А. Гагарин аатынан понерскай дружина Володя Дубинин аатынан пионерскай этэрээт бэрэссэдээтэлинэн үлэлээбит Сабардахова С.М., кинигэ тахсарыгар күүс-көмө буолбут СӨ доруобуйатын харыстабылын туйгуна Петрова Л.П., Хотугулуу Илиҥ Сибиирдээҕи аэронавигация Ньурбатааҕы филиалыгар радиооператорынан үлэлиир Егомина С.П., Ю.Гагарин аатынан пионерскай дружина 1987-1988 cc. бэрэссэдээтэлэ Семенова М.Е. эттилэр.
Эҕэрдэлэргэ ыраах Калиниград куораттан эдьиийдии-балыстыы Лейла уонна Оксана Шарабориналар кыттыстылар, пионер сылларын туһунан истиҥ ахтыыларын, эҕэрдэлэрин видеонан ыыппыттарын тэрээһин кыттыылаахтара бары сэргээн көрбүттэрэ. Ксенофонт Дмитриевич Уткин аатынан түмэл научнай салаатын сотруднига Борисов Б.Б. Ньурба улууһуттан «Артекка» сылдьыбыт бастакы пионерка Алевтина Константиновна Татаринова туһунан кэпсээбитэ. Истиҥ-иһирэх көрсүһүү уопсай хаартыскаҕа түһүүнэн түмүктэммитэ. Урукку пионерскай сыллары санаппыт кинигэ сүрэхтэниититтэн мустубут дьон астынан, дуоһуйа сэлэһэн тарҕаспыттара. Ааптардар Р.С.Бушкова, В.Н.Котоконова сыралаах үлэлэрин түмүгэр тахсыбыт «Пионерия умнуллубат сырдык өйдөбүллэрэ» кинигэ инники көлүөнэҕэ хаалар улахан бэлэх буолара саарбаҕа суох. Бу кинигэттэн билиҥҥи көлүөнэ Сэбиэскэй Сойуус саҕана Ньурбаҕа пионердар тэрилтэлэрэ хайдах үлэлээбитин туһунан элбэх интэриэһинэйи булан ааҕыахтара.
Биһиги, Убайаан оскуолатын выпускниктара, Ю.А.Гагарин аатынан пионерскай дружина үлэтэ үйэтитиллэн кинигэҕэ киирбитин үөрэ-көтө, долгуйа, сэҥээрэ көрүстүбүт.
Мария (Федорова) Семенова- Ю.А.Гагарин аатынан пионерскай дружина 1987-1988 сс. бэрэссэдээтэлэ