Уйбаан Ороһуунускай аатынан Ороһутааҕы библиотекаҕа Ийэ тыл нэдиэлэтин чэрчитинэн олунньу ый 16 күнүгэр уйулҕа чинчийээччитэ, МГУ аспирана Анна Артуровна Иванова «Оҕону классическай литература нөҥүө иитии» диэн лекцията буолан ааста.
Кэлбит ыалдьыттарга Анна Артуровна хас биирдии иэйиинэн киирбит айымньы Үрдүкү Айыылар, орто дойду олохтоохторо, олох тутулун биллиннэр диэн тиэрдэллэр эбит диир. Онтон аныгы оҕоҕо кинигэ ааҕары, билэ-көрө сатыыр дьоҕуру хайдах уһуйабыт диэн кэбэҕэс ыйытыкка, хас биирдии оҕоҕо төрөппүтэ дьоһун холобур буолар. Төрөппүт оҕону кыра эрдэҕиттэн илдьэ сылдьан, айылҕа кэрэтин кэрэхсиигэ, амарах санааҕа, айыыларга, иччилэргэ сүгүрүйэргэ уһуйдаҕына, дууһата чараас эйгэни ылынымтыа буола улаатар.
Түмүктээн эттэххэ, аныгы төрөппүт оҕотун уһуйуон баҕарар буоллаҕына, бастатан туран, бэйэтэ элбэххэ уһуйуллуохтаах, элбэҕи билэ-көрө сатыахтаах, тоҕо диэтэр оҕо диэн төрөппүт сиэркилэтэ буолар.
Жанна Иванова, Уйбаан Ороһуунускай аатынан Ороһутааҕы библиотека сэбиэдиссэйэ.