Олунньу 16 күнүгэр Күүкэй оскуолатын бастакы директора Анатолий Константинович Акимов 70 сааһыгар аналлаах истиҥ ахтыы күнэ буолан ааста. Тэрээһин Анатолий Константинович сөбүлүүр полонез Огинского муусукатынан саҕаламмыта.
Кини олоҕун кэрчик кэмнэрин хаартыскалаах слайданан кэпсэннэ. Оскуолабыт директора Егор Иванович Алексеев, Анатолий Константинович Акимов ырааҕы анааран көрөр, сайдыы кэскилин түстээн нэһилиэги түмэ тардар күүстээх хаачыстыбалаах салайааччы киһи этэ. Сылтан сыл аайы оскуоланы ситиһии саҥа кэрдииһигэр таһаарбыта, киэҥ эйгэҕэ киллэрбитэ. Үөрэхтээһин үрдүк таһымын ыларга үтүө дьон олоҕун киэн тутта, холобур оҥостор суолу тутуһуннарбыта. Ытык дьоннорбутун педагогическай династия Самсоновтарын, Е.Г. Егоровы, В.Г. Кривошапкины, Р.И. Бравинаны, В.В. Илларионовы уонна да атыттары кытта ыкса сибээһи олохтоон көлүөнэ быстыбат ситимин холбообут улахан өҥөлөөх. Эдэр эрчимнээх, сатабыллаах толкуйдаах салайааччы кылгас кэмҥэ саба тутан ситиспитэ үгүс диэн сырдатта.
Кини маҥнай ситэтэ суох орто оскуоланы төрүттээбит, 1996 с. Күүкэй ситэтэ суох орто оскуолата орто оскуола аатын ылбыт, саҥа мастерской дьиэтин, спортивнай залы туттаран үлэҕэ киллэрбит, оскуола материальнай баазатын хаҥаппыт, кылаастарга араас оборудованиены ылбыт, уол оҕону эт-хаан өттүнэн сайыннарыыга тустууну уонна мас тардыһыытын дьүөрэ тутан киллэрбит. Бу үлэ түмүктэринэн аатын үйэтитэн биһиги оскуолабыт 2003 сылтан Анатолий Константинович Акимов аатын сүгэрин чопчулаан эттэ.
Онтон орто оскуола буолбутугар химия, физика уонна да атын кабинеттар толору хааччыллыылаах буолбуттара үөрэххэ, билиигэ тардыһыыга төрүөт буолбута диэн ол кэмнэргэ үөрэх завуһунан үлэлээбит Ангелина Петровна Евсеева холобурдаан кэпсээтэ.
Мария Васильевна Николаева Анатолий Константинович саха оскуолаларыгар национальнай коцепция киириитин өйөөн оскуолаҕа ураты сахалыы тыыны олохтообута, национальнай култуура кабинета тэрийбит. Олоҥхоҕо болҕомто ууран эбии үөрэтиини киллэрэн оҕолорбут өрөспүүбүлүкэҕэ ситиһиилэнэр буолбуттара диэн Львова Саргыны, Сахаяны, Матвеева Юлияны киэн тутта ааттаталаата.
Билигин омук тылын үөрэтэр учууталбыт Тамара Геннадьевна кыра сылдьан Анатолий Константиновиһы тугу өйдөөн хаалбытын истиҥник кэпсээтэ. Кинини оҕо хараҕынан көрдөҕүнэ уһун сонноох, хара көстүүмнээх, билиилээх-көрүүлээх, интелеллигентнай киһинэн өйдөөн хаалбыт. Кинилэргэ хаһыат сурунаал элбэҕин онтон ордорон «Мурзилка» сурунаалы сэргээбитин эттэ.
Үөрэнээччилэрин аатыттан Андреев Николай Игнатьевич, физкультура учуутала, Күүкэй оскуолата ситэтэ суох эрдэҕинэ оҕолор, ол иһигэр мин ийэм Кутанаҕа интернакка олорон үөрэммиттэрэ. Хата, биһиги үөрэнэр кэммитигэр орто оскуолалаах буолан дьиэбититтэн тэйбэккэ үөрэҕи ылбыппыт. Тэрээһин түмүгүнэн үйэтитэр сыаллаах Анатолий Константинович алтыспыт дьонноруттан кылаас барыта ахтыы хомуйар сорудах ыллыбыт. Бииргэ үөрэммит доҕоро Николаев Клим Гаврильевич уонна төрөппүт уола Владимир, бииргэ үлэлээбит кэллиэгэлэрин ахтыылара тиһиллибит папка оскуола түмэлигэр туттарылынна. Уонна бары кыттыылаахтар Анатолий Константинович “Суруктар” диэн таптыыр ырыатын оҕо сааһын доҕоро Мария Васильевна Захарова толоруутугар ырыаны тэҥҥэ ыллаһыынан түмүктэннэ.
Варя Евсеева, «Кустук» пресс-киин, Күүкэй.