Биһиги сахабыт тыла олус баай, дириҥ историялаах, атын омук тылларыгар холоотоххо олус кэрэтик иһиллэр. Тылбыт сүппэтин, симэлийбэтин туһугар биһиги, эдэр көлүөнэ, төрөөбүт тылбытын ыһыктыбакка сахалыы тыыннаан, үтүө сиэргэ – майгыга уһуйан инникигэ эрэллээхтик, харыстаан илдьэ сылдьыахтаахпыт.
Ол курдук, сахабыт тылын сүмэтин хоһооҥҥо, кэпсээннэргэ тиһэн суруйар биһиги учууталбыт, олохтоох суруйааччыбыт Мария Матвеевна Данилова -Күн Мичээрин туһунан кэпсиэхпин баҕарабын.
Мария Матвеевна Бүтүн омуктар икки ардыларынааҕы суруйааччылар Союзтарын чилиэнэ, норуоттар икки ардыларынааҕы искусство уонна наука академияларын чилиэн корреспонедена, Сунтаар улууһун суруйааччыларын «Ньургуһун» түмсүү чилиэнэ. Суруйбут айымньыларынан араас таһымнаах күрэхтэргэ кыттан Ф.М. Достоевскай, Петр I, М. Борис Богатков аатынан мэдээллэр хаһаайкалара. Ону таһынан, Санкт-Петербургтааҕы «Творчество и потенциал», Хотугу Америка суруйааччыларын холбоһуга, «Лондон гильдията» түмсүүлэр чилиэннэрэ. бу барыта сүрдээх сыралаах үлэттэн, иэйииттэн тахсыбыт ситиһии буолар. Маны таһынан, Мария Матвеевна хас да кинигэ автора, » Өкүлүүн барахсан», «Бастыҥа», «Маайыстыыр кэпсиир». 2018 сыллаахха » Российский колокол» сурунаал «Бессмертный полк» анал таһаарыытыгар 5 хоһооно, икки пъесата киирбиттэрэ. 16 хоһооно талыллан «Души прекрасные порывы» диэн хомуурунньуга А.С. Пушкин төрөөбүт күнүгэр тахсаары турар.
Мария Матвеевна суруйар эрэ буолбатах, араас элбэх дьарыктаах. Холобур, уруһуйдуур, хаартыскаҕа түһэрэр, оҕуруонан тиһэр, быысапкалыыр, иллэҥ кэмигэр айылҕалыын алтыһар.
Түбэй орто оскуолатыгар 1992 сыллаахтан саха тылын уонна литературатын учууталынан өр сыл үлэлээбитэ. Билигин бочуоттаах сынньалаҥҥа олорор. Элбэх оҕону төрөөбүт сахабыт тылыгар үөрэппитэ, айаннарга илдьэ сылдьан айылҕа кэрэтигэр умсугуппута, төрүт түөлбэлэригэр тапталы иҥэрбитэ.
Биһиги Мария Матвеевна курдук дойдутугар бэриниилээх, төрөөбүт төрүт тылбытын өрө тутар талааннаах учууталга үөрэнэ сылдьыбыппытынан киэн туттабыт. Кини хас биирдии ийэ тыл сүмэтиттэн ылбыт иэйиитэ биһигини кынаттыыр, умсугутар. Айар үлэҥ арыллан, сайдан кэҥээн истин.
Вилена Илларионова, 10 кылаас,
Түбэй орто оскуолата, Сунтаар.
#кэскиллээхолоххобэлэмбуол