Олунньу 11 күнүгэр, Уус Алдан улууһун Окоемовкатын «Алгыс» КСК туонатыгар саҥа үүммүт 2023 сыл Саха өрөспүүбүлүкэтигэр Үлэ сыла биллэриллибитинэн сүрдээх сэргэх, сонун «Ыанньыксыт күрэҕэ» диэн тэрээһин буолан ааста.
Биэс түһүмэхтээх илин-кэлин түсүһүүлээх күрэх быыһыгар, оскуолабыт медиа оскуолатын кыргыттара, Аммосова Снежанна, Бурнашева Валя, Колодезникова Саша уонна мин буолан музыкальнай нүөмэрдэринэн үҥкүүлээн, ыллаан дьоро киэһэни киэргэттибит.
Ол курдук, кыттааччылар, сүөһү иитиитигэр сыһыаннаах ыйытыыларга эппиэттээтилэр, сэппирээтэри бириэмэҕэ ыстылар — таҥнылар, балтараа миэтэрэ усталаах сүөһү быатын баайдылар, мас оҕус муоһугар 5 төхтүрүйэн уһун быаны кэтэртилэр, хомуллан турар доильнай аппараты бириэмэҕэ ыһан хомуйдулар.
Күрэх түмүгүнэн муҥутуур кыайыылааҕынан Елизавета Коммунаровна Аммосова ааттанна. 2 миэстэни Анна Николаевна Протопопова, 3 миэстэни Васильева Светлана Семеновна ылары ситистилэр уонна «Мүрү- Ас» СХППК, Уус Алдан тыатын хаһаайыстыбатын управлениятын ааттарыттан сыаналаах бириистэринэн наҕараадаланнылар. Окоемова Анастасия Афанасьевна, Иванов Савва Иннокентьевич сертификаттарынан уонна «Алгыс» КСК туруорбут бириистэринэн наҕараадаланнылар.
«Алгыс» КСК үлэһиттэригэр махталбытын тиэрдэбит. Өссө да бу курдук киһи кэрэхсиир тэрээһиннэрин ыыта тураргытыгар баҕарабыт.
Саша Колодезникова, 7-с кылаас,
И. В. Пухов аатынан Окоемовка сүрүн оскуолата, Уус Алдан.
#кэскиллээхолоххобэлэмбуол