Биир саастыылаахпыт Корнелия Иванова туһунан билиһиннэрэбит. Кини 7 кылааска дылы Ороһуга үөрэммитэ, ол кэннэ уруһуйдуур баҕатын сайыннарар сыаллаах суруйааччы Никифор Кирикович Седалищев-Дьүөгэ Ааныстыырап аатынан Кэнтик орто оскуолатыгар 8 кылааска үөрэнэ барбыта.
Маны таһынан кини Үөһээ Бүлүүтээҕи Николай Бойлохов аатынан оҕо ускуустубатын оскуолатын преподавателэ Майя Васильевна Саввина салалталаах уруһуй кылааһыгар дьарыктанар, кылааһын салайааччыта нуучча тылын уонна литературатын учуутала Наталья Фёдоровна Будищева.
Удьуор утумнуур диэн мээнэҕэ эппэттэр. Корнелия хос эһээтэ Василий Иванович Иванов тимир ууһа, рационализатор этэ. Кини 1976 сыллаахха вакуум көмөтүнэн фермаларга сүөһү ноһуомун оботторор, сүөкүүр сыарҕаны оҥорон илии үлэтин чэпчэппитэ. Ону таһынан чуурканан оттуллар гаас-генератор тыраахтыр мотуорун убаҕас уматыгынан солбуйан, генераторын уларытар, Ороһу олохтоохторун хас да кыһын Ильич сырдык уотунан хааччыйбытын күн бүгүҥҥэ диэри махтанан кэпсэл оҥостоллор.
Таайа Терентий Васильевич уруһуйдьут, мас ууһа. «Якутзолото» хампаанньаҕа үлэлиир кэмигэр оҥорбут киэргэлэ «Комдрагметалл» түмэлигэр турар.
Корнелия живопись, скульптура, уруһуй маастарыстыбатын баһылыыр баҕалаах үөрэнэ сылдьар. Кини ону таһынан комикс уруһуйдуурга холонор. Ол сыалтан ааспыт сайын Дьокуускай куоракка «Geek-fest» аныгы култуура бэстибээлигэр Москваттан комикс ааптара Фёдор Нечийталоны кытта санаа атастаһан турар. Үөһээ Бүлүүтээҕи кииннэммит библиотечнай ситим оҕо библиотеката Олоҥхо ыһыаҕар анаан таһаарбыт «Олоҥхо матыыбынан комикс-альбом» кинигэлэригэр уруһуйа киирбитэ.
Корнелия Арассыыйаҕа ыытыллыбыт «Большая страна-2022» уруһуй күрэҕэр «Заготовка льда» уруһуйа иккис истиэпэннээх лауреат аатын ылбыта.
Корнелиянан киэн туттабыт! Уруһуй эйгэтигэр үөрэнэн, баһылаан үүнэ-сайда турарыгар баҕарабыт.
Алина ЯКОВЛЕВА, «Тымтык» эдкорпост, Ороһу.