Соторутааҕыта мин быраатым Дьокуускай куоракка баран “Сосновый бор” диэн оҕо лааҕырыгар сынньанан кэллэ. Мин киниттэн кылгас интервью ыллым.
-Бастаан, баһаалыста, бэйэҕин билиһиннэр эрэ, “Кэскил” ааҕааччыларыгар.
-Мин аатым Рома Брызгалов, И.Г. Тимофеев аатынан Майа лиссиэйин 7 кылааһын үөрэнээччитэбин.
-Республикатааҕы «Сосновый бор» лааҕыр туһунан кылгастык кэпсиэҥ.
-Мин билэрбинэн, лааҕыр 2012 сыллаахха бэс ыйын 1 күнүгэр аһыллыбыт, турар сирэ куорат таһа, онон чуумпу. Лааҕыр территориятыгар улахан олорор куорпус, спортивнай хонуу, оҕо былаһаакката, араас тренажердар уонна хаартыскаҕа түһэр зоналар бааллар. Оҕолор манна сылы эргиччи сынньаналлар эбит.
-Лааҕырга эн хайдах ылыллыбыккыный?
-Биһиги кылааспытыттан куонкуруска кытта алтыа буолан барбыппыт. Мин хас да сыл Табаҕаҕа театральнай кылааска дьарыктаммытым, онно араас тэрээһиннэргэ, куонкурустарга кыттан хоһоон ааҕарга үөрэммитим.
-Эн лааҕырга ханнык сменаҕа сырыттыҥ?
-Биһиги сылдьыбыт сменабыт САССР тэриллибитэ 100 сылыгар аналлаах “Көтүөххэ үрдүккэ хотойдуу” диэн этэ. Куонкуруспут аата эмиэ итинник этэ. Барыта 110 уол: Бүлүү, Кэбээйи, Нам, Үөһээ Бүлүү, Өлүөхүмэ, Таатта, Уус-Алдан, Чурапчы улуустарыттан, ону таһынан, Тулагыттан уонна Дьокуускай куораттан баар этэ.
-Эн санааҕар, бу сылдьыбыт сменаҥ атыттартан туох уратылааҕый?
-Сылдьыбыт сменабыт уратыта диэн барыта уолаттар этэ.
-Лааҕырга туох саҥаҕа үөрэнниҥ, тугу ордук сөбүлээтиҥ?
-Мин английскай тылга үөрэммитим уонна уруһуй куруһуогар сылдьан, айылҕаны, кыыллары уруһуйдуурга эбии үөрэнним. Экскурсиялары олус диэн сөбүлээбитим. Холобур, “Россия – моя история” музейга уонна Саха театрыгар сылдьыбыппытын. Театрга артыыс Алексей Павлов 65 сааһыгар анаммыт “Беранже хоруол” диэн испэктээкили көрбүппүт, музейга анал байыаннай операцияҕа анаммыт быыстапкаҕа сылдьыбыппыт. Маны таһынан, лааҕырбытыгар араас интэриэһинэй тэрээһиннэр бөҕө ыытыллыбыттара: “Киноквиз”, “Фотокросс”, “Караоке-стар”, библиотека үлэһиттэрэ литературнай турнир ыыппыттара.
-Аны куонкурус туһунан аҕыйах тыл.
-Биһигини хоһоон ааҕарга учууталлар Александра Гоголева уонна Алена Рязанская дьарыктаабыттара. Куонкурус Оҕо дыбарыаһыгар алтынньы 28 күнүгэр буолбута. Биһиги “Бастыҥ арыйыы” диэн номинацияҕа тиксибиппит.
Быраатым лааҕыры, сылдьыбыт сменатын олус сөбүлээбит. “Сосновый бор” лааҕыр өссө сайдан истин диэн баҕа санаатын этэр.
Толя Брызгалов, 11 «2» кылаас, Майа лиссиэйэ, Мэҥэ-Хаҥалас улууһа.