Алтынньы 28 күнүгэр биһиги оскуолабытыгар республика биир биллэр сулуһа Дмитрий Баишев биһигини үөрдэн, ыалдьыттаан барбыта.
Оскуола оҕолоро бары кини кэлэриттэн олус соһуйбуппут уонна долгуйа күүппүппүт. Киэһэ оскуолаҕа көрсүһүү буолбута. Дмитрий Баишев киирэригэр оҕолор уонна үлэһиттэр сүрдээх үчүгэйдик көрсүбүппүт. Оҕолор бары көрүдүөргэ аан иннигэр киирэрин кэтэһэн турбуппут. Дмитрий Баишев киирбитигэр бары тэҥҥэ «Ураа» диэбиппит, уонна «Дмитрий Баишевка уруй — айхал!» диэн уруйдуу көрсүбүппүт. Бэйэтэ олус сэҥээрбитэ, биһигини хайҕаабыта.
Онтон оскуолабыт лиидэрэ Аайа Макарова үөрэхпит кыһатын историятын кылгастык билиһиннэрбитэ.
Дмитрий Баишев бэйэтин туһунан кэпсээбитэ уонна оҕолор ыйытыыларыгар эппиэттээбитэ. Бэйэтин олоҕун үөрүйэҕиттэн түгэннэри кэпсээбитэ, артыыс буолуон баҕарар оҕолорго элбэх сүбэни биэрбитэ. Ыйытыылар кэнниттэн, уопсай уонна биирдиилээн хаартыскаҕа түһүү буолбута.
«Суорат» бөлөх артыыһа, вайнер Дмитрий Баишевы кытта олус туһалаах истиҥ кэпсэтии буолан ааста. Оҕолор бэйэлэригэр туһалааҕы ыйытан, хаартыскаҕа түһэн көрсүһүүбүтүн түмүктээбиппит.
Бүтэһигэр 9 кылаас үөрэнээччилэрэ Антон Захаров Дмитрий Баишевтыын «Гимн» тэттик көрдөөх видеоҕа уһуллубута, Алгыстан Максимов вайны уһулбута.
Азиза Копырина, 9 кылаас үөрэнээччитэ, «Проба пера» эдэр кэрэспэдьиэнэ,
Чыамайыкы, Мэҥэ Хаҥалас