Балаҕан ыйын 23-24 күннэригэр Саха АССР төрүттэммитэ 100 сылыгар аналлаах “Юнармия” өрөспүүбүлүкэтээҕи VII сүлүөтэ Дьокуускайга үрдүк таhымнаахтык буолан ааспыта. Биhиги оскуолабыт “Бэргэн” байыаннай кулууба онно кыттар чиэстэммитэ.
Кулууп эдэр байыастара улууска, өрөспүүбүлүкэҕэ, ону ааһан Бүтүн Россиятааҕы күрэхтэһиилэргэ куруутун көхтөөхтүк кытталлар, куруук инники күөҥҥэ сылдьаллар, хаһыс да төгүлүн “Океан”, “Артек” оҕо Кииннэригэр улахан куонкуруһу ааһан, босхо путевкаларга тиксэн, эбии дьарыктанан, үөрэнэн кэлэллэр. Сүлүөт туһунан Х “Б” кылаас үөрэнээччитэ Эрхан Андросовы кытта кэпсэтиини ааҕыҥ:
-Сүлүөт кэмигэр сыал ытыыга, гиирэни анньыыга, автоматы ыһыыга, хомуйууга, КСУ күрэхтэр буолбуттара. Гиирэни анньыыга Саша Павлов (Х “Б” кыл.) бэркэ кыттан, II миэстэ буолары ситиспитэ. Сүлүөт үөрүүлээх сабыллыытыгар арай миигин соhуччу сыанаҕа ыҥырдылар уонна Феликс Поморцев аатынан юнармейскай мэтээли туттарбыттара. Бу олох долгутуулаах, үөрүүлээх түгэн этэ. Феликс Поморцев – РФ ФСБ капитана, “Вымпел” 2-с отделение старшай оперуполномоченнайа. Кини Хотугу Кавказка контртеррористическай операцияҕа дьоруойдуу бааhыран, олоҕун толук уурбут хорсун байыас. СӨ Ыччат уонна дьиэ кэргэн политикатын Министиэристибэтэ кини сырдык аатыгар, үрдүк ситиһиилээх “Юнармия” чилиэннэригэр мэтээл олохтоон, туттарар буолбута.
—Маннык курдук үрдүк таhымнаах араас күрэхтэһиилэргэ “Бэргэн” байыаннай кулууп оҕолоро кыттаргыт биhирэбиллээх. Бэйэҥ хаһан бу кулууп иитиллээччитэ буолбуккунуй?
-Мин “Бэргэн” кулуупка VIII кылаастан сөбүлээн дьарыктанабын. Салайааччыбыт Ирина Юрьевна Тарасенко биhигини араас күрэхтэргэ, тэрээhиннэргэ бэлэмнээн кытыннаран, элбэх ситиһиилэнэбит.
-Күрэхтэргэ уонна хомуурдарга кыттаргыт таһынан, өссө тугунан дьарыктанаҕыт?
-Биhиги оҕолорбут бу күрэхтэртэн ураты Россия араас лааҕырдарын байыаннай-патриотическай сменаларыгар сынньанан кэлэллэр.
-“Бэргэн” кулууп эйиэхэ туох суолталааҕый, тугу биэрэрий?
-“Бэргэҥҥэ” сылдьарым эт-хаан, өй-санаа өттүнэн сайдарбар ордук көмөлөhөр, олус интэриэhинэй, элбэх саҥаны үөрэтэбин.
-Инники идэҕин талан олороҕун дуо? Байыаннай дьыала өттүнэн барар санаалааххын дуо?
-Инники идэбин таларга техничэскэй өттүнэн барыахпын баҕарабын. Билигин техническэй хайысхалаах кылааска үөрэнэбин. Ол эрээри, “Бэргэн” кулууп миигин элбэххэ үөрэттэ, инники олохпор элбэх туһалааҕы биллим.
—Эрхан, кэпсээниҥ иһин махтал, өссө элбэх ситиһиини баҕарабыт.
Сонун эйгэҕэ холонон
Сүлүөт кыттыылаахтара Х “Б” кылаас үөрэнээччилэрэ Юра Прудецкай, Дайаана Гуляева “Юнармия” чэрчитинэн иккис төгүлүн Бүтүн Россиятааҕы лааҕырга баран, эбии дьарыктанан кэллилэр. Кинилэр “Бэргэн” байыаннай-патриотическай кулуупка 2017 сылтан дьарыктаналлар. Дайаана: “Бэйэбэр саҥаны арыйаары, сонун эйгэҕэ холонон көрөөрү, бу кулуупка киирбитим олус туһалаата”, диэн үөрэ-көтө санаатын үллэстэр, инникитин юрист идэтин таларыгар бу дьарыга көмө буолар диэн эрэллээх. Оттон Юра бу байыаннай кулуупка дьарыктанан, былырыын “Океан” лааҕырга “Зарница” күрэхтэһиигэ I, оттон быйылгы “Артек” лааҕырга күрэхтэһэн, II миэстэ буолары ситистэ уонна бу сайын Дьокуускай куоракка Россия күнүгэр “Юнармия” III истиэпэннээх килбиэнин бэлиэтинэн наҕараадаламмыта кини ситиһиитин туоһулуур. Иккиэн “Бэргэҥҥэ” дьарыктаналлара инники олохторугар туһалаах буолуоҕар бүк эрэллээхтэр. Былырыын “Океан” лааҕырга “Юнармейские маршруты” хайысхаҕа ылбыт билиилэрин, сатабылларын быйыл “Артек” лааҕырга өссө күүскэ дьарыктаммыттар. Автоматы ыһыыга, хомуйууга биэс бастыҥ иһигэр киирбиттэр, автомат маҕаһыынын таҥыыга I, хамаанданан күрэхтэһиигэ II миэстэ буолары ситиспиттэр. Юра Калашников автоматы ыһыыга, хомуйууга бастыҥ бириэмэни көрдөрөн, кыайыылаах үрдүк аатын ылбыт. Онон оҕолор Саха сирин оҕолорун ааттарын үрдүктүк ааттатан, үрдүк таһымнаах бэлэмнээхтэрин көрдөрбүттэр, элбэх мэтээл, грамота наҕараадалаах дойдуларыгар кэрэ кэпсээн кэһилээх кэлбиттэр.
Дайаана ордук “Артегы” сөбүлээбит, бэйэтигэр өссө элбэх саҥаны, сонуну арыйбыт, билиитэ хаҥаабыт, оттон Юра “Артек” ыраах баар буолан, киһи ордук дьиэтин, дойдутун ахтар эбит диэн бэлиэтиир.
Бу курдук оскуолабыт “Бэргэн” байыаннай-патриотическай кулууба оҕолору төрөөбүт дойдуну таптыырга, дойдуга бэриниилээх буолууга иитэр-үөрэтэр, олох хайа баҕарар түгэнигэр тулуурдаах, инникигэ дьулуурдаах ыччаты иитиигэ төһүү кылааты киллэрэр.
Майя Боярова, Дуня Старостина, XI “А” кылаас үөрэнээччилэрэ, Таатта улууһун Алампа аатынан Ытык-Күөл орто оскуолатын “Ситим” кулуубун эдэр кэрэспэдьиэннэрэ