Алтынньы 18-28 күннэригэр СӨ Наука аччыгый академиятын иһинэн «Медиа-ракета «Кэскил» смена үлэлээн түмүктэннэ.
Уон күн устата Бүлүү уонна Үөһээ Бүлүү улууһун эдэр кэрэспэдьиэннэрэ ыстатыйаны таба суруйарга, интервью ыларга, видео уһуларга, таҥарга үөрэннилэр, матырыйааллара сайтка, хаһыакка, сурунаалга таҕыстылар.
Медиасменаҕа үөрэммиттэрин туоһулуур суруктары уонна сэмэй бэлэхтэри туттулар.
Эдкордар кэпсииллэр:
-Биллэн турар, ыллыҥ да суруйар биһиэхэ, саҥа саҕалаан эрэр оҕолорго, уустук. Ол эрээри, суруналыыс диэн «универсальнай» идэ диэххэ сөп. Кини олоххо баар эйгэни барытын кыайа тутан суруйуохтаах. Суруналыыс ханнык баҕарар хайысханы сатаан сырдатар дьоҕурдаах киһи. Оннук буоларга кыһаллабыт.
Быраабылалар:
1. Суруйуоҥ иннинэ, суруйар тиэмэҕин чопчу билиэхтээххин.
2. Аатын бастаан, эбэтэр кэлин хаалларан толкуйдуохха сөп.
3. Ханнык баҕарар матырыйаал үс чаастан турар: киириитэ, сүрүн чааһа, түмүгэ.
4. Эдкор орфография, грамматика, сурук бэлиэлэрин быраабылаларын тутуһан суруйуохтаах.
5. Ыстатыйа логическай уонна фактическай сыыһата суох буолуохтаах.
6. Ыстатыйаҕа араспаанньа аат кэнниттэн суруллар. Холобур: «Иван Иванович Иванов», «Балаһаны бэлэмнээтэ Илона Руфова».
7. Сайтка уонна хаһыакка суруйар кыра уратылардаах. Сайт матырыйаалын аатыгар үксүгэр кэпсиирэ баар буолуохтаах. Тоҕо диэтэххэ, интернет-суруналыыстыка дьон болҕомтотун тута тардыахтаах, интэриэһинэй, сонун хамсааһын баара биллиэхтээх.
Ону таһынан, бэлиэтиэ этибит: хаартыскаҕа түһэрэргэ, видео уһуларга камераны куруук сытыары тутуохтааххын. Сайтка, хаһыакка үчүгэй хаачыстыбалаах хаартысканы биэриэхтээххин.
Эдкордары, Оля Николаеваны, Илона Руфованы, Алина Санникованы, Света Каратаеваны, кытта кэпсэттэ Эльдар Садовников