СӨ Наука аччыгый академиятыгар сыл ахсын араас улуустартан оҕо бөҕө кэлэр. Бэйэм чопчулаан этэбин: аччыгый академия сменаларыгар үөрэммит оҕолор — саамай дьоллоохтор.
Тоҕо диэтэххэ, манна араас саҥаны-сонуну, интэриэһинэйи билэбит. Мин 2021 сыллаахха, балаҕан ыйыгар, аан бастакыбын эдкордар сменаларыгар үөрэнэ кэлбитим. Урукку куорпуска олорбуппут. Араас оҕолору кытта билсибитим, аһаҕас, кэпсэтинньэҥ буолбутум. Билигин сорохпут суруналыыстыка үөрэҕэр үөрэнэ сылдьар.
Мин санаабар, СӨ Наука аччыгый академията оҕолорго инники кирбиилэри дабайарга, арыйарга көмөлөһөр. Ый ахсын араас хабааннаах үөрэх ыытыллар. Биһиги ол дьоллоох оҕолор ортолоругар киирэрбититтэн олус үөрэбит. Бэйэбит сменабытыгар, эдэр кэрэспэдьиэннэр, ыстатыйаны таба суруйарга, интервью ыларга, видео устарга, таҥарга үөрэннибит. Үлэни киһи оҥорор, онон хас биирдии үлэбит, кыра да буоллар, арыйыыбыт улахан суолталаахтар.
Элбэх үөрэнээччи суруналыыс идэтин баһылаары, маҥнайгы хардыылары оҥороору, оскуолатын сонунун сырдатар уонна сменаҕа путевка ылан үөрэнэр.
Оля Николаева, Г. И. Чиряев аатынан Бүлүү 1 нүөмэрдээх орто оскуолатын 8 кылааһын үөрэнээччитэ