Саха Республикатын тыатын хаһаайыстыбатын Министиэристибитэ тэриллибитэ 100 сылынан бэлиэ оҥоһуллубутун, биир дойдулаахпыт, Саха Республикатын норуотун хаһаайыстыбатын, РСФСР тыатын хаһаайыстыбатын үтүөлээх үлэһитэ, рационализатор, нэһилиэк Бочуоттаах олохтооҕо Владимир Елисеевич Ойуунускай 75 сааһын бэлиэтиир күҥҥэ түбэһиннэрэн, алтынньы 22 күнүгэр, Ороһу нэһилиэгэр тыатын хаһаайыстыбатын үтүө суобастаахтык үлэлээбит дьоҥҥо бэлиэни туттардылар. Мин эбэм уонна эһэм бу чиэскэ тиксибиттэриттэн олус үөрдүм.
Эбэм, Анна Степановна Ласточкина, 1972-2017 сс. диэри арыы собуотугар үлэлээбитэ. Собуот икки симиэнэнэн сарсыарда эрдэттэн киэһэ хойукка дылы үлэлиирэ. Күҥҥэ 5-6 тонна үүтү эрийэн сүөгэй сүүрдэллэрэ, арыы оҥороллоро.
Эһэм, Григорий Саввич Ласточкин, 1960-2004 сс. Исидор Барахов аатынан Ороһу отделениетигар араас үлэҕэ гаражка хачыгаарынан, фермаҕа ньирэй, субан сүөһү көрүүтүгэр илиитин араарбакка үлэлээбитэ. Биэнсийэ тахсан баран, кэтэх хаһаайыстыбатын тутан олорор.
Эбэлээх эһээбинэн киэн туттабын! Кинилэр үлэлээн ааспыт үлэлэрин сыаналыыбын, үйэтитэбин!
Алина Ласточкина, Ороһу