Алтынньы 20 күнүгэр лааҕырбытыгар М. К. Аммосов аатынан ХИФУ ХИНТуоКИ “Литературное творчество” бөлөх III куурсун устудьуоннара Николай Федоров уонна Милена Гаврильева ыалдьыттаатылар.
Кинилэр үөрэхтэригэр ханнык предмет туттаран киирбиттэрин, хайдах туттарсыбыттарын, тоҕо бу хайысханы, институту талбыттарын, стипендия туһунан, тугунан дьарыктаналларын сырдаттылар.
Николай 8 кылаастан үөрэммит оскуолатыгар корреспондент куруһуогар дьарыктаммыт. Билигин үөрэҕин таһынан, «Саха» НКИК “Саҥа күн” корреспонденынан, “Виктория” араадьыйаҕа ыытааччынан ситиһиилээхтик үлэлиир. Ыытааччы хайдах тутта-хапта сылдьыахтааҕын туһунан Николай маастар-кылаас ыытта.
Оттон Милена кыра сааһыттан ырыаҕа умсугуйан ыллыырын сөбүлүүр эбит. Кинилэр биһиэхэ “Саҥа күн” биэриини көрдөрдүлэр, онно туох сыыһа баарын таайтардылар.
Ол кэнниттэн олус көрдөөх, интэриэһинэй оонньуу ыыттылар. Корреспондент, ыалдьыт оруолун оонньоотубут. Араас тиэмэлэргэ аҕыйах бириэмэ иһигэр боппуруос толкуйдуурга, саҥарарга-иҥэрэргэ үөрэннибит. Сорох оҕолор ыалдьыттарбытыттан интервью ыллылар.
Мин санаабар, устудьуоннар маннык кэпсииллэрэ оҕолорго олус наадалаах уонна туһалаах. Хас да оҕо бу үөрэххэ туттарсыан баҕа санааланна.
Биһиги кинилэр кэпсээбиттэриттэн элбэх саҥаны, наадалааҕы биллибит, иһиттибит. Николайга уонна Миленаҕа лааҕыр оҕолоро улахан махталбытын тиэрдэбит!
Алина Санникова, VIII кылаас,
“Медиа-ракета Кэскил» иитиллээччитэ.