Биһиэхэ, Бүлүү улууһун Сэбиэскэй Сойуус Геройа Алексей Алексеевич Миронов аатын сүгэр Мастаах орто оскуолатыгар «По стопам Героя, лесника Степанова» диэн оскуола оҕолорун ойууру харыстааччыларын түмсүүлэрэ 2018 сылтан оскуола дириэктэрэ С.Н. Николаев сатабыллаах салалтатынан ситиһиилээхтик үлэлиир. Түмсүүгэ V-X кылаас оҕолоро сэттэ араас хайысханы хабан үлэлиибит: “Организация мини питомника в условиях села Балагаччы”, “Экологическая тропа”, “Яблоневый сад “Живая память”, “Изучение озера “Мастах”, летний дневной лагерь “Юный эколог”, профориентационнай уонна научнай-чинчийэр үлэлэр.
Бу үөрэх дьылыгар түмсүүбүтүгэр 21 үөрэнээччи хабылынна. Улуус таһымнаах күрэхтэртэн саҕалаан, федеральнайга тиийэ ситиһиилээхтик кыттыыбыт туоһута — араас граннарга тиксиибит, грамоталарбыт уонна дипломнарбыт буолаллар. Олортон сорохторун ааттаталаатахха: эдэр лесничэйдэр өрөспүүбүлүкэтээҕи сүлүөттэригэр 2019 с. “Яркий дебют” номинация, регионнааҕы “Зелёный пояс Вилюя” диэн оскуола лесничестволарын куонкуруһугар эмиэ ити сыл I миэстэни, 2020 с. “Добро не уходит на каникулы” диэн ааттаах Россиятааҕы куонкуруска кыайан, 377 тыһыынча сууммалаах грант, 2021с. улуустааҕы оскуола лесничестволарын күрэҕэр I миэстэ, өрөспүүбүлүкэҕэ II, “Школа – эколидер Республики Саха (Якутия)” куонкуруска I миэстэ, грантовай үлэлэр өрөспүүбүлүкэтээҕи куоталаһыыларыгар “Лучший проект экологических инициатив” ааты ылан, кыайан, 100 тыһ. грант, улуус баһылыга оскуолаларга ыыппыт инновационнай бырайыактарын куоталаһыыларыгар эмиэ кыайан, 100 тыһ. ылан үөрбүппүт-көппүппүт. 2022 с. өрөспүүбүлүкэҕэ оскуола оҕолоругар ыытыллыбыт эколандшафтнай бырайыактар куоталаһыыларыгар “Эколандшафтный проект моей школы” диэн номинацияҕа II миэстэни ылбыппыт.
Маны таһынан, бу хайыскаҕа араас таһымнаах куонкурустарга, биктэриинэлэргэ, научнай-практическай кэмпириэнсийэлэргэ, уруһуй, хаартыска күрэхтэригэр тиһигин быспакка оскуолабыт бары оҕолоро кыттабыт. Күһүн-саас олорор дэриэбинэбит тулатын, оҕо площадкатын, олорор күөлбүт тулатын бары тахсан ыраастыыбыт, ойууру уонна айылҕаны харыстыырга ыҥырар былакааттары ыйыыбыт уонна видеороликтары устабыт. Тиксибит граннарбыт үбүнэн көмөлөһүннэрэн, ааспыт саас муус устар ыйыгар биир дойдулаахпыт, олоҕун ойуур харыстабылыгар анаабыт Сэбиэскэй Сойуус Геройа А.А. Миронов аатынан оскуолабытыгар элбэх араас тэриллээх экологическай кабинет үөрүүлээхтик арыллыбыта. Онно улуус, экология, лесхоз, үөрэх салаатын салалталара кыттыбыттара, кэс тылларын, баҕа санааларын тиэрдибиттэрэ биһиэхэ инникигэ эрэли, кыаҕы күүһүртэ.
Эколандшафтнай бырайыакпыт чэрчитинэн ааспыт сайын эмиэ элбэх үүнээйилэри олордубуппут, көрбүппүт-харайбыппыт. Бу сайыҥҥыттан ХИФУ ботаническай саада тэрийэн ыытар «Возьми дерево в свою семью» диэн бырайыагар кытта сылдьабыт. Олордубут мастарбытын кэтээн көрөбүт уонна харайабыт. Быйыл садпытыгар эбии хортуоска уонна хаппыыста үүннэрэн боруобалаатыбыт. Түмүктэрэ үөрдэр.
Оскуолабыт тэлгэһэтигэр сылын аайы араас сибэккилэр, талахтар уонна мастар элбээн иһэллэрэ кимиэхэ баҕарар тута харахха быраҕыллар буолла. Көрүөххэ да олус кэрэ, “киһи сүргэтэ көтөҕүллэр”, диэни элбэхтик истэр буоллубут.
Оҕолоор, туох барыта тулалыыр айылҕабытыттан саҕаланарын умнумуоҕуҥ! Харыстыырга кыахпыт тиийэринэн кыттыһыаҕыҥ!
ххx
“Защитим лес от пожара” диэн социальнай рекламаны устууга өрөспүүбүлүкэтээҕи күөн күрэс түмүктэннэ. Онно “Лучший видеоролик” номинацияҕа Бүлүү улууһун Сэбиэскэй Сойуус Геройа А.А. Миронов аатынан Мастаах орто оскуолатын ( дир. С.Н. Николаев) айар бөлөҕө “Берегите лес от пожара” үлэтинэн диплом тутта. Роликка олохтоох биэбэйик иитиллээччилэрэ уһуллубуттар (иитээччи Мария Святославовна Дмитриева).
Дарианна Алексеева, VIII кылаас, Юлиана Захарова, IX кылаас үөрэнээччилэрэ,
“По стопам Героя, лесника Степанова» диэн Сэбиэскэй Сойуус Геройа Алексей Алексеевич Миронов аатын сүгэр Мастаах орто оскуолатын лесничествотын чилиэттэрэ, Бүлүү улууһа.