Сайын оҕо спордунан дьарыктанан доруобуйатын чэбдигирдэр, эт-хаан өттүгэр сайдар саамай тоҕоостоох кэмэ буолар. Хаптаҕай оскуолатын футболист уолаттарын туһунан “Кустук” студия салайааччыта Нина Яковлева кэпсиир.
Оскуолабыт футболунан дьарыктанар уолаттара физкультура учуутала, тренер Андрей Александрович Яковлев салалтатынан сайыны олус туһалаахтык атаардылар. Ол курдук, быйылгы улуустааҕы «Кожаный мяч-2022» күрэххэ кыайан, улуус сүүмэрдэммит хамаандатыгар киирэн, бэс ыйын 12-15 куннэригэр «Туймаада» стадиоҥҥа өрөспүүбүлүкэ бастыҥ хамаандаларын кытары күрэхтэһэн, бастакыларын улахан футбол хонуутугар оонньууга холоннулар, уопут ыллылар.
Үрдүкү бөлөххө улуус сүүмэрдэммит хамаандата, биһигиттэн Ренат Васильев, Владиан Назаров (VIII кылаастар) кыттыылаах, өрөспүүбүлүкэҕэ II миэстэ буолары ситистэ! Орто бөлөххө Максим Васильев, Ариан Кычкин, Уран Мордовской, Коля Семенов, Сережа Яковлев, Айыллаан Блинов, Айсен Дайбанныров IV миэстэ буоллулар. Алын бөлөх оҕолоро эмиэ бэркэ оонньоотулар.
Кыайыыларынан кынаттанан салгыы оҕолорбут Лоомтука оскуолатын баазатыгар тэриллибит «Чэбдик» футбол лааҕырыгар икки симиэнэҕэ сынньаннылар, футболга дьарыктаннылар. Лааҕырга тренер Максим Александрович уолаттары үчүгэйдик дьарыктаата. Иитээччилэр Ульяна Ивановна, Надежда Вячеславовна, минньигэс астаах повардар Сардана Афанасьевна, Сусанна Ивановна оҕолор сынньалаҥнара туһалаахтык ааһарыгар кыһамньыларын уурдулар. Уолаттарбыт бириэмэлэрин олус туһалаахтык атаардылар диэн төрөппүттэр, учууталлар үөрэллэр.