Бу куонкурус Саха АССР төрүттэммитэ 100 сылыгар уонна улууспутугар ыытыллар VIII-с спортивнай оонньууларга ананна.
Биһиги улууспутугар түҥ былыргыттан киэҥ эйгэҕэ биллэр мас, тимир уустара, сурукка киирибитинэн 104 олоҥхоһут олорон ааспыта биллэр. Бу бүгүн ыытыллыбыт сүдү суолталаах, олоҥхо курдук дириҥ-баай ис хоһоонноох культурабытын уустар илиилэрин иһиттэн уһааран таһааран мас оҥоһукка көрдөрөр туспа эйгэлээх тэрээһин буолан ааста. Улахан үлэ кэнниттэн дьүүллүүр сүбэ быһаарыытынан үһүс миэстэ Нам улууһуттан Василий Аргунов, иккис миэстэ Мэҥэ Хаҥалас улууһуттан Архип Скрябин уонна норуоттар икки ардыларынааҕы мас оҥоһуктар куонкурус муҥутуур кыайыылааҕынан ааттанна Москва уобалаһын Богородскай куоратыттан кэлбит ыалдьыппыт Владимир Алманов. Кини бу күрэххэ «Байанай» моһуонун оҥорон таһаарда.
Түмүккэ «Олоҥхо» этно-комплекс тэлгэһэтигэр мас оҥоһуктар аллеялара үөрүүлээх быһыыга-майгыга аһылынна. Аалай лиэнтэни быстылар Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Сергей Местников, улууспут Аҕа баһылыга Алексей Федотов, Саха Өрөспүүбүлүкэтин култуураҕа уонна духуобунай сайдыыга миниистирин солбуйааччы Владислав Левочкин, бырайыак ааптара Иван Румянцев, Саха Өрөспүүбүлүкэтин Олоҥхо ассоцияциятын чилиэнэ, Уус Алдан олоҥхуһуттарын чинчийээччи Мария Сивцева, Олоҥхо этно-культурнай комплекс салайааччыта Елизавета Данилова. Көрбүт эрэ сөҕө-махтайа көрөр оҥоһуктарын уһааран таһаарбыт уран уустарга улуус дьаһалтатын уонна олохтоохторун ааттарыттан барҕа махтал буолуохтун!
Алина Гриц, Дуня Сивцева,
Мүрү 1 №-дээх орто оскуолатын выпускниктара