Бэс ыйын 20-21 күннэригэр Үөһээ Бүлүүгэ ыытыллар Олоҥхо ыһыаҕын тэрээһиннэрин сырдатыыга биһиги эдэр кэрэспэдьиэннэрбит үлэлииллэрин туһунан кэпсээн турабыт. Ааспыт таһаарыыга Дүллүкү эдэр кэрэспэдьиэннэрин туһунан иһитиннэрбиппит. Аны билигин эмиэ сырдатыы, тарҕатыы үлэтигэр тэҥҥэ сылдьыһар, «Кэскил» оҕо бэчээтин кыһатын кытары өр кэмҥэ үлэлээн кэлбит Ороһу орто оскуолатын «Иэйиэхсит-Тымтык » оҕо бөлөҕүн эдэр кэрэспэдьиэннэрин билиһиннэриэхпит.
1990 сылтан «Иэйиэхсит-Тымтык » оҕо бөлөҕүн Нина Никитична Михайлова үрдүк таһаарыылаахтык салайар. Бу куруһуоктан элбэх оҕо куорсун анньынан билигин Сахабыт сирин араас муннуктарыгар учууталларын аатын ааттата сылдьалллар.
Дьэ, эрэ, Ороһуттан Олоҥхо ыһыаҕын эдэр кэрэспэдьиэннэрэ кимий?
Валерий Ласточкин — 8 кылаас үөрэнээччитэ, «Ороһу уоланнара» диэн хоһоон ааҕар уолаттар бөлөхтөрүгэр сылдьар. Бөлөх өрөспүүбүлүкэҕэ кэтэхтэн поэт В.Ф. Гольдеров 90 сааһыгар аналлаах ыытыллыбыт күрэххэ 3 миэстэ уонна улууска ССРС норуодунай учуутала М.А. Алексеев 95 сааһыгар «Учуутал, эн үрдүк ааккар сүгүрүйэбин…», Саха АССР 100 сааһынан «Өйдүүбүт, кэриэстиибит, киэн туттабыт» композицияҕа ситиһиилээхтик кыттыбыттара.
Надежда Котоконова — ССРС норуодунай учуутала М.А. Алексеев аатынан интернат-лиссиэй 10 кылааһын үөрэнээччитэ. Ороһу орто оскуолатыгар үөрэнэ сылдьыбыт кэмигэр «Тымтык» эдэр кэрэспэдьиэннэр постарыгар дьарыктаммыта. «Кэскил» хаһыакка ыстатыйата бэчээттэммитэ.
Өрөспүүбүлүкэҕэ Г.С. Угаровка аналлаах научнай-практическай конференцияҕа 3 миэстэлээх, улууска «Норуот өркөн өйө — ытык тыла» 1 миэстэлээх, онтон интернат-лиссиэй иһинэн ыытыллыбыт «Олоҥхо дьыктааныгар» 1 миэстэни, химия олимпиадатыгар 1 миэстэни ылбыта.
Айна Тарасова — 8 кылаас үөрэнээччитэ. Алын кылаастан «Иэйиэхсит- Тымтык» оҕо бөлөҕөр дьарыктанар. Үөрэҕэр туйгун. Тыл, математика олимпиадатыгар улууска ситиһиилээхтик кыттар, тарбаҕар талааннаах (уруһуйдьут, иистэнньэҥ). 2022-23 үөрэх сылыгар туттарсан, интернат-лиссиэй үөрэнээччитэ буолла. Онтон биһиги үөрэбит уонна киэн туттабыт!
Эдэр кэрэспэдьиэннэрбитигэр айымньылаах үлэни, сытыы бөрүөнү, интэриэһинэй биэриилэри баҕарабыт!
Бэлэмнээтэ Анна СЛЕПЦОВА.
keskil14.ru