Бэс ыйын 20-21 күннэригэр Үөһээ Бүлүүгэ ыытыллар Олоҥхо ыһыаҕын тэрээһиннэрин сырдатыыга биһиги эдэр кэрэспэдьиэннэрбит үлэлиэхтэрэ. Эдкордары «Кэскил» оҕо бэчээтин кыһатын эдэр үлэһиттэрэ — кэрэспэдьиэннэр Кристина Иванова уонна Эльдар Садовников салайан илдьэ сылдьыахтара.
Дүллүкү орто оскуолатыттан 3 оҕо Олоҥхо ыһыаҕар үлэлии барар. Кинилэр үһүөн » Эрчим» эдкорпоска дьарыктаналлар.
Этэн аһардахха, Дүллүкү оскуолатыгар корпост 1983 сылтан үлэлиир. Номнуо сотору 40 сыллаах үбүлүөйдээх бэлиэ сыла. Ол онтон 20-чэ сылы саха тылын уонна литературатын учуутала Антонина Ивановна Афанасьева ситиһиилээхтик салайан кэллэ, элбэх оҕону айар-суруйар эйгэҕэ сыһыарда, олохторун суолун арыйалларыгар олук уурда.
Дьэ, ити курдук, Олоҥхо ыһыаҕыттан сонуну-нуобаһы биһиэхэ ким тириэрдиэй?
Дайаана Федорова — кини быйыл10 кылааһы бүтэрдэ. 5- с кылаастан эдэр кэрэспэдьиэннэр куруһуоктарыгар сылдьар. «Кэскил», «Үөһээ Бүлүү» хаһыаттарга оскуола, нэһилиэк сонуннарын ыытар, куонкурустарга кыттар. Оскуола хаһыатын, биэриилэрин редактора. Үчүгэйдик үөрэнэр, улуустааҕы предметнэй олимпиадалар призёрдара, спортсменка, чэпчэки атлетиканан дьарыктанар, ситиһиилэрдээх. Манчаары оонньууларыгар кыттыыны ылбыта, призёр.
Уруйдаана Афанасьева — эмиэ 10 кылааһы бүтэрдэ. 5- с кылаастан эдкордар куруһуоктарыгар сылдьар. «Кэскил», «Үөһээ Бүлүү» хаһыаттарга оскуола, нэһилиэк сонуннарын ыытар, куонкурустарга кыттар, » Бары бииргэ», «Саха сирэ умнубат» о.д.а. куонкурустарга ситиһиилээхтик кыттыбыта. «Кэскил» слётун кыттыылааҕа, «Бастакы президентэн ыйыт» өрөспүүбүлүкэтээҕи пресс- конференцияҕа кыттыбыта. Оскуола хаһыатын, биэриилэрин редактора. Үчүгэйдик үөрэнэр, улуустааҕы предметнэй олимпиадалар призёрдара. 10 кылааска Үөһээ Бүлүүтээҕи өрөспүүбүлүкэтээҕи гимназияҕа үөрэннэ. Ол эрээри эдкорпостка син-биир дьарыктанар.
Анна Тобохова — 9 кылаас үөрэнээччитэ. Иккис сылын эдкорпостка дьарыктанар. Оскуола актыбыыһа, айарын-суруйарын сөбүлүүр, сытыы-хотуу кыыс. «Кэскилгэ», » Үөһээ Бүлүүгэ» үлэлэрэ бэчээттэммитэ. Билигин ОГЭ ситиһиилээхтик туттарар түбүгэр сылдьар. Аннаҕа ситиһиилэри баҕарарыаҕыҥ!
Маны таһынан Ороһу орто оскуолатын эдэр кэрэспэдьиэннэрэ Олоҥхо ыһыаҕар эмиэ үлэлиэхтэрэ. Кинилэр тустарынан сотору кэминэн сырдатыахпыт.
Эдкордарбытыгар айымньылаах күүстээх үлэни баҕарабыт уонна буруолуу сылдьар сэргэх сонуннары, интэриэһинэй репортажтары күүтэ хаалабыт!
Кэпсэттэ Анна СЛЕПЦОВА.