Мүрү 1 №-дээх орто оскуолатыгар икки игирэ оҕолор үөрэнэллэр.
Бастакынан билиһиннэрэр игирэ оҕолорум Данил, Кирилл Жирковтар II “Г” кылааһы “5” уонна “4” сыаналарынан түмүктээтилэр. Уолаттар ийэлэрэ Октябрина Тимофеевна Жиркова Окомовка сүрүн оскуолатын математика учуутала, аҕалара Роман Иванович Жирков СӨ ИДьМ Уус Алданнааҕы полициятыгар дьуһуурунай чааска үлэлиир. Жирковтар эдэр ыал түөрт оҕолоохтор. Игирэ уолаттар ыал улахан оҕолоро, Анжела Мүрү 1 №-дээх орто оскуолатын I “Б” кылааһын бүтэрдэ. Кыралара Ромина — 10 ыйдаах. Ийэлэрэ билигин кыратын көрөн олорор.
“Игирэлэр 2013 сыл Дьахтар күнүн эрэ иннинэ, бэлэх курдук, кулун тутар 5 күнүгэр төрөөбүттэрэ. Данил 4 мүнүүтэ эрдэ төрөөн, Кириллгэ убайа буолар. Биһиги дьиэ кэргэн спорду өрө тутабыт, ол иһин оҕолорбутун кыра эрдэхтэриттэн спорка сыһыарабыт, уолаттар истэриттэн баҕаран туран дьарыктаналлар. Өрүү сүүрэ-көтө, хамсана сылдьаллар. Быйылгы үөрэх сылыгар уолаттар иккиэн оскуола учууталыгар И.И. Ивановка наартаны ойууга дьарыктаннылар. Кирилл наартаны ойууга өрөспүүбүлүкэ чемпиона буолла, оттон Данил 5-с миэстэҕэ тахсыбыта. Улуустааҕы хапсаҕай күрэҕэр Кирилл 3-с миэстэни ылбыта, Данил анал аат хаһаайына буолбута. Данил убай убай курдук боччумнаах, Кирилл куруук үөрэ-көтө сылдьар майгылаах. Уолаттар иккис кылааска Окоемовка сүрүн оскуолатыттан Мүрү орто оскуолатыгар кэлбиттэрэ, элэккэй, аһаҕас майгылаах буолан, тута оҕолору кытта уопсай тылы булбуттара, коллективка түргэнник киирбиттэрэ. Уолаттарым тас көрүҥнэринэн майгыннаһаллар. Өрүү бииргэ буолаллар, тапсан оонньууллар, аҕыйах да кэмҥэ арахсыстахтарына суохтаһаллар. Уруоктарыгар бииргэ бэлэмнэнэллэр, бэйэ-бэйэлэригэр көмөлөсүһэн ааҕаллар. Ыал улахаттара буолан балыстарын көрсөллөр, туһа дьоно. Үөрэх дьыла түмүктэнэн, Окоемовкаҕа сайылыы кэллибит. Уолаттар күөх дуолга, ыраас салгыҥҥа сылдьан сүүрүөхтэрэ-көтүөхтэрэ, ол быыһыгар дьиэ үлэтигэр көмө буолуохтара,” — диэн Октябрина Тимофеевна уолаттарын туһунан кэпсээтэ. Кырачаан уолаттар этэҥҥэ сылдьан, улаатан истэхтэрин аайы ийэлээх аҕаларыгар кынаттара буолуо турдахтара.
Иккис игирэлэр Анисия, Савелий Шелковниковтар оскуола III “Б”кылааһын түмүктээтилэр. Иккиэн үөрэх туйгуннара. Шелковниковтар алта оҕолоох ыал буолаллар. Улахан кыыс Валерия VI “Б”кылаас туйгун үөрэнээччитэ. Вадим VII “Г” кылааһы үөрэнэн бүтэрдэ. Анисиялаах Савелий 2012 сыл атырдьах ыйын 10 күнүгэр төрөөбүттэрэ. Оттон өссө иккис игирэ оҕолор кэлэллэр. Клара, Егор 2015 сыл олунньу 20 күнүгэр күн сирин көрбүттэрэ. Маннык икки игирэлээх ыал Саха сиригэр да оччо элбэҕэ суохтара буолуо. Ыал ийэтэ Лилия Валерьевна Г.Г. Никифоров аатынан улуустааҕы киин балыыһа сүрүн бухгалтера, аҕалара Егор Егорович баахтанан үлэҕэ сылдьар. Анисия, Савелий туйгуннук үөрэнэллэрин таһынан көхтөөх оҕолор, кылаас үлэтигэр өрүүтүн кытталлар. Анисия “Кэнчээри” оҕо народнай ансаамбылыгар үҥкүүлүүр, элбэх ситиһиилэрдээх, үҥкүү бөлөҕүнэн үгүс көрүүлэргэ миэстэлэһэр. Савелий “Өркөн” оҕону эбии үөрэхтээһин киинигэр “Лепка” куруһуогар сөбүлээн сылдьар.
Ийэлэрэ Лидия Валерьевна этэринэн оҕолор төһө да игирэлэр эрээри, атын-атын майгылаахтар. Анисия имигэс, нарын-намчы. Оттон Савелий уола өтөн сытыы-хотуу, ордук футболу сөбүлүүр. Иккиэн “Кэскил” уһуйааҥҥа сылдьыбыттара, олох кыра эрдэхтэриттэн бэйэ-бэйэлэрин көрсөллөр, иккиэн да сытыы дьон. Игирэ балыстаах бырааттарын кытта бүөбэйдэһэллэр. Аны күһүҥҥэттэн икки кыралар оскуола дьоно буолуохтара. Савелий Чэриктэйгэ эбэтигэр бараары былааннанар, оттон Анисия Бороҕоҥҥо “Кэнчээри” ансаамбыл үҥкүү бөлөҕөр салгыы дьарыктанар. Ити курдук игирэлэр сайыҥҥы сынньалаҥнарын көрдөөхтүк атаарыахтара.
Игирэ Данил, Кирилл Жирковтар, Анисия, Савелий Шелковниковтар өрүү бииргэ буоллуннар, сайынын көрдөөхтүк сынньанныннар, күлэ-үөрэ чуопчаара сырыттыннар.
Е. Сыроватская, уопсас. кэрэсп.