Булуҥ улууһун Бороҕон орто оскуолатын оҕолоро Пионерия 100 сылын көрсө «Зарница-2022» оонньууга кытыннылар. Ол туһунан оскуолата Бороҕон орто оскуолатын дириэктэрэ Жанна Прокопьевна Осипова иһитиннэрэр.
— Оонньууну эрдэттэн былааннаан, хамаандалары аттаран туруоран, тэрээһин үлэтиттэн саҕалаан оонньуу түмүктэниэр диэри толкуйдаан олус интэриэһинэй, оҕо-аймах астынар түмсүүтэ буолан ааста. Биһиэхэ билигин халлааммыт да сылыйда, саас кэлбит сибикитэ билиннэ, онон эт-хаан, өй-санаа уһун кыһынтан уһуктар кэмэ. «Зарницабыт» линиэйкэттэн саҕаланна, ол курдук оҕолор бойобуой сорудах ыла охсон, айаҥҥа туруннулар. Оонньуу буолуохтаах сиригэр хайа хамаанда бастакы тиийэрэ эмиэ биир сүрүн түһүмэҕинэн буолла. Оҕолорбут урукку пионердар сырыыларын айаннаан, ол кэминээҕи үөрэнээччилэр оонньууларын көхтөөхтүк оонньоон, күлэн-үөрэн, астынан-дуоһуйан, ыллаан-туойан дьиэлэригэр тарҕастылар. Бү күрэххэ учууталлар эмиэ туспа хамаанда буолан кыттан, оҕо саастарын санаан ыллылар. Маны таһынан, хамаандалар оонньуу иннинэ «Тимуровецтар десаннарыгар» сылдьыбыттара. Ол курдук олохтоох кырдьаҕастарга мастарын саһааннаан, уу баһан көмөлөспүттэрэ. Ити курдук биһиги оскуолабытыгар үтүөни тарҕатар, оҕоҕо холобур буолар тэрээһиннэр ыытыллаллара кэрэхсэбиллээх.
