Ыам ыйын 18 күнүгэр Ньурба улууһун Акана орто оскуолатыгар «Дьулус» оҕо түмсүүтэ Пионерия 100 сааһын көрсө «Салют Пионерии!» диэн пионерскай түмсүүнү ыытта.
Түмсүү лиидэрдэрэ, учууталлар, бэтэрээн пионердар этэрээттэрэ тахсааһынынан саҕаланна. Онтон барабан, горн ньиргиэринэн Бүтүн Сойуустааҕы пионерскай знамяны уонна биир сомоҕо «Дьулуур» оҕо түмсүүтүн, Бүтүн Арассыыйатааҕы оҕо түмсүүтүн былаахтарын бастыҥ лиидэрдэр таһаардылар.
Хас биирдии этэрээт хамандыыра пионерскай түмсүү бэрэссэдээтэлигэр рапорт туттарда. Пионердар Бүтүн Сойуустааҕы пионерскай тэрилтэ гимнин ыллаатылар. Үөрүүлээх быһыыга-майгыга оскуола дириэктэрэ Е.Ф. Мигалкина бэтэрээн баһаатайдарга Пионерия 100 сыллаах үбүлүөйдээх мэтээлин туттартаата.
Түмсүү иккис чааһыгар «Дьулус» оҕо түмсүүтүн лиидэрдэрэ кэлбит ыалдьыттары эҕэрдэлээтилэр. Бэтэрээннэр пионерскай ырыалары ыллаатылар, ол кэмнэрин сылаастык ахтан санаан аастылар.
А.П. СОРКОМОВА, «Дьулус» оҕо түмсүүтүн салайааччыта.
Источник: keskil14.ru