Бары билэрбит курдук, аҕа дьиэ кэргэн баһылыга буолар. Оччоттон-баччаҕа дылы аҕа киһи булан-талан, бултаан-алтаан дьонун-сэргэтин иитэр-аһатар, көмүскүүр-араҥаччылыыр ураты аналлаах. Кини тыыппалаах өйдөөх-санаалаах, соргулаах, булугас, түргэн-тарҕан хамсаныылаах, хаһан да, ханнык да түгэҥҥэ ыарахантан чаҕыйбат буоллаҕына биһиги бары олохпут-дьаһахпын дьолунан, сылаас сыһыанынан туолар.
Ол курдук, сааскы сыралҕаннаах күннэрдээх, туллук чыычаах ырыалаах муус устар ыйыгар, дойдубут килбэйэр киинигэр, долгуйар дьоллоох Дьокуускай куорат 6-с нүөмэрдээх оскуолатыгар 1 “В” кылаас күндүттэн күндү аҕаларбытыгар араас эриэккэс күрэс тэрийэн ыыппыппыт.
Амарах аҕаларбыт бу күн, күннээҕи түбүктэн босхолонон, биһигини кытары тэҥинэн оҕо-аймах ортотугар киирэн, күлэн-үөрэн, оонньоон-көрүлээн сүргэлэрэ көтөҕүллэн, Ньукуолун күн кус миинэ испит саҕа астынан-дуоһуйан тарҕаспыттара.
Тэрээһиммитин тутаах дьоммут, аҕаларбыт куттарын-сүрдэрин тутар курдук үс түһүмэххэ арааран ыыттыбыт.
Маҥнайгы түһүмэх – оҕо-аймах амарах аҕаларбытыгар анаан суруйбут соргулаах суруктарбытын, бэтиэхэлээх бичиктэрбитин, манньытар мандардарбытын бэлэх ууннубут.
Иккис түһүмэх: өй-санаа толоонугар илин-кэлин түсүһүү, биэтэккэ бастакы кэлэргэ дьулуһар викторина. Кыайыылаах Виктор Гаврильевич.
Үһүс түһүмэх: “Мин аҕабынаан” киһи өйүгэр-санаатыгар үйэлэри уҥуордаан ааһар саһарбат хаартыскалар фото-выставкалара.
Тэрээһин түмүгэр тапталлаах аҕаларбытыгар анаан көрдөөх-нардаах ылбаҕай ырыалары, хомоҕой хоһооннору, сиэдэрэй сэһэннэри, чаҕылхай чабырҕахтары бэлэх гынан утары уунаммыт сүрэхтэрин-санааларын сүүйдүбүт.
Бу маннык моһуоннаах тэрээһин мэлдьи ыытыллара кэрэхсэбиллээх диэн соргулаах санаа хас биирдиибитигэр киирбитэ саарбаҕа суох.
Аҕаларбытын ис сүрэхтэн эҕэрдэлиибит, олус күүскэ таптыыбыт уонна килэмэн халлаан саҕа барҕа махталбытын тиэрдэбит!
Аделина Яковлева, Дьокуускай куорат 6 нүөмэрдээх оскуолатын 1 кылааһын үөрэнээччитэ
Раиса Егоровна Аммосова, кылаас салайааччыта