В.П.Ларионов аатынан Майа орто оскуолатыгар академик Владимир Петрович Ларионов төрөөбүтэ 84 сылыгар, Мэҥэ Хаҥалас улууһа төрүттэммит күнүгэр аналлаах миитин ыытылынна.
Бүгүн, олунньу 10 күнүгэр, үтүө-мааны үлэһит дьонноох, батталы утары туруммут Манчаары дьоруойдаах, олоҥхоҕо хоһуйуллар кэрэ айылҕалаах Мэҥэ Хаҥалас улууһа төрүттэммитэ 92 сылын бэлиэтиибит. Бу бэлиэ күҥҥэ сахаттан бастакы академик, техническэй наука доктора, уһулуччулаах учуонай Владимир Петрович Ларионов Мэҥэ Хаҥалас улууһун I Тыыллыма нэһилиэгэр күн сирин көрбүтэ.
Төрөөбүт дойдутун сайдыытын, кэскиллээх инникитин туһугар олоҕун анаабыт, саха норуотун чулуу учуонайа уонна науканы тэрийээччитэ Владимир Петрович Ларионов баараҕай байҕал кэриэтэ дириҥ ис хоһоонноох олоҕор төһүү күүс кэрдииһинэн үөрэммит оскуолата буолар.
Академик аатын сүгэр оскуола үөрэнээччилэрэ Владимир Петрович үөрэммит оскуолатыгар үөрэнэллэринэн киэн тутталлар, кини аатын ытыктыыллар, сүгүрүйэллэр! Владимир Петрович төрөөбүт, улуус тэриллибит күнүн улахан суолта ууран, киэҥ хабааннаахтык сыллата бэлиэтиибит. Академик аатын үйэтитэн, ытыктыыр киһибит мэҥэ тааһын иннигэр миитин ыытан, сибэкки дьөрбөтүн, венок уурабыт.
Быйылгы миитин ыҥырыылаах ыалдьыттарынан Мэнэ – Ханалас улууһун баһылыгын маҥнайгы солбуйааччыта Семен Семенович Потапов, Майа сэлиэнньэтин баһылыга Дмитрий Иванович Тихонов буоллулар. 
Ытыктабыллаах ыалдьыттар бэлиэ күнүнэн эҕэрдэлээн туран, кэнчээри ыччат, Саха сирин сайдарын туһугар олохторун анаабыт ытык дьоммут үтүө холобурдарынан, төрөөбүт дойдуларыгар бэриниилээх, дьоһун дьон буола улааталларыгар үтүө баҕа санааларын тиэртилэр. Бу күн оскуола тумус туттар Х кылааһын уолаттара сахалыы хомоҕой хоһоонунан тэрээһини киэргэттилэр. «Звезда» юнармия этэрээтин эдэр байыастара академик мэҥэ тааһын иннигэр сүгүрүйүү бэлиэтин – веногу уурдулар.
Владимир Петрович Ларионов оскуолаҕа үөрэнэр сылларыгар туйгун үөрэхтээҕин, эҥкилэ суох бэрээдэктээҕин, билиигэ ураты дьулуурдааҕын бииргэ үөрэммит доҕотторун уонна учууталларын ахтыылара кэрэһэлииллэр. Кини Майа орто оскуолатын кыһыл көмүс мэтээлинэн бүтэрбитэ. Владимир Петрович Ларионов аатын сүгэр оскуола үөрэнээччилэрэ, академик үтүө холобурунан, туйгуннук үөрэнэргэ, научнай-чинчийэр үлэнэн дьарыктанарга дьулуһаллар. Сыллата оскуола кэлэктиибэ олунньу 1 маҥнайгы күнүттэн Владимир Петрович Ларионов сырдык аатын үйэтитэр сыаллаах дэкээдэни киэҥ хабааннаахтык бэлиэтиир.
Быйыл өрөспүүбүлүкэ таһымнаах «Юный ларионовец» НПК, цифровой уонна бизнес технологиялар бэстибээллэрэ, «Дебаттар», «Аман өс», «Агроскиллс», анабыл хоһооннор күрэхтэрэ, робототехническэй турнир, техническэй айар үлэ быыстапката, олимпиадалар өрөспүүбүлүкэ бары улуустарын хабан киэҥ хабааннаахтык ыытылыннылар. Олунньу 11 күнүгэр Бүтүн Россия таһымнаах «Ларионов ааҕыылара» НПК буолара былааннанар.
Владимир Петрович төрөөбүт күнүгэр сөп түбэһиннэрэн, оскуола туйгун үөрэнээччилэрин «Володя Ларионов галереятыгар» киллэрии тэрээһинэ, кылаас чаастара үөрүүлээх быһыыга-майгыга ыытылыннылар. Кинилэр ааттара «Володя Ларионов дневнигэр» суруллан, оскуола мусуойугар өйдөбүнньүк буолан ууруллар. 
Наука бары үктэлин эрэллээхтик дабайан, академик буола үүммүт, киэн туттар киһибит Владимир Петрович Ларионов аата суолдьут сулус буолан кэнчээри ыччаты үрдүккэ, сырдыкка ыҥыра-угуйа, сирдии туруохтун!
Изабелла Романова,
«Мэҥэбил» пресс-киин.