Бүгүн, ахсынньы 8 күнүгэр, сахалартан бастакы Советскай Союз Геройа Федор Кузьмич Попов төрөөбүтэ 100 сыла.
Аҕа дойду улуу сэриитин Геройа Фёдор Кузьмич Попов 100 сааһыгар анаан тохсунньу ыйтан улууспутугар «Герой Сулуһа» эстафета саҕаламмыта, Мэҥэ-Хаӊалас оскуолаларыгар, уһуйааннарыгар сырытта.
Сэтинньи 27 күнүгэр биһиги нэһилиэкпитигэр Тиэлиги оскуолатын оҕолоро биир долгутуулаах күммүтүн уруйдаан ыалдьыттыы кэлбиттэрэ, «Герой Сулуһа» эстафета бэлиэтин аҕалбыттара.
Үөрүүлээх линейкаҕа история учуутала А.П. Созонова Ф.К.Попов туһунан ахтыбыта, улуустааҕы«По следам героя» проект түмүгүнэн биһиги оскуолабытыттан 4 үөрэнээччи баран кэлбитин сырдаппыта, кини хаан-уруу аймахтарын Фёдоров Ильяны (11 кылаас), Фёдорова Сардаананы (7 кылаас) кэлбит ыалдьыттарга билиһиннэрбитэ.
Ф.К. Попов сулуһун А.А.Пахомов аатынан Тиэлиги орто оскуолатын директора Василий Павлович Денисов биһиги оскуолабыт директор эбээһинэһин толорооччуга Романова Любовь Евгеньевнаҕа туттарбыта.
Рапорт-альбом иһигэр улууспут оскуолалара, уһуйааннара олус үчүгэйдик кылаас чааһын ыыппыт хаартыскаларын иилбиттэр, сорох оскуола күрэхтэһии ыыппыт түмүгүн, сорудаҕын киллэрбиттэр. Биһиэхэ бүтэһик соҕус кэлбит буолан рапорт-альбом силигэ ситэн эрэрэ көрөргө олус интэриэһинэй этэ, оҕолор астына көрбүппүт. Герой сулуһун илэ харахпытынан көрөн астыммыппыт. Салгыы уһуйааммытыгар оскуолабыт актыыбын оҕолоро илдьэн биэрбиттэрэ, уһуйаан иитиллээччилэригэр Ф.К. Попов туһунан кэпсээбиттэрэ.
Бу күннэргэ биһиги оскуолабытыттан Белоруссияҕа оскуолабыт лидера, 9 кылаас үөрэнээччитэ Артем Прокопьев Ф.К. Попов сылдьыбыт сирдэрин кытта билсэ сылдьар, киниттэн элбэх интэриэһинэйи истиэхпит диэн эрэллээхпит.
«Герой Сулуһа» эстафета салгыы Бырама оскуолатыгар айаннаабыта. Бүгүн Фёдор Кузьмич Попов төрөөбүт күнүгэр, ахсынньы 8 күнүгэр, кини төрөөбүт нэһилиэгэр Сыымахха тиийиэхтээх.
Азиза КОПЫРИНА, Чыамайыкы орто оскуолатын
8 кылааһын үөрэнээччитэ, «Проба пера» эдэр кэрэспэндьиэнэ.