Сэтинньи 25 күнүттэн «Смотри, это Россия!» үөрэнээччилэр куонкурустарын видеороликтарыгар куоластааһын саҕаланна. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Арассыыйа бары эрэгийиэннэрин түмэ тарпыт бырайыак оҕолор дойдуларын туһунан элбэҕи билэллэригэр көмөлөһөр.
Быйыл кыттааччылар бэйэлэрин олорор сирдэрин номохторун кэпсээтилэр. Холобур, Саха сирин үөрэнээччилэрэ уот, ойууннар, мамоннар, Тымныы Оҕуһун уонна Чысхаан туһунан сырдаттылар.
Сонун, мультипликационнай ролик, театральнай туруоруу, документальнай киинэ быһыытынан матырыйаалы тиэрдии интэриэһи тардыбыт. Куонкурус сүрүн ирдэбилэ — тэрийээччилэр талбыт эрэгэйиэннэригэр үөрэнээччилэр бэйэлэрин эҕэрдэлэрин тиэрдэллэр.
Быйыл урукку сыллардааҕар элбэх үлэ киирдэ, 85 эрэгийиэн үөрэнээччилэрэ бэйэлэрин үлэлэрин ыыттылар. Уопсайа 3600-тэн тахса хамаанда бэлиэтэннэ, ол эбэтэр 18 тыһыынча кыттааччы. Ордук элбэх ролик Саха сириттэн, Москваттан уонна Санкт-Петербургтан киирбит.
Куоластааһын ахсынньы 9 күнүгэр диэри үс бөлөххө арааран кыайыылаахтары көрөөччүлэр быһаарыахтара. Куонкурус партнердара анал аат хаһаайыттарын быһаарыахтара.