Мин учууталым
«Учуутал» диэн идэ баара олус үчүгэй! Учуутал оҕону кэрэҕэ уһуйар, оҕону өйдөөх-төйдөөх, ситиһиилээх оҥорорго кыһаллар. Учууталы оҕолор убаастыахтаахтар, истиэхтээхтэр.
Оскуолаҕа олус элбэх араас биридимиэттэр бааллар, олору араас идэлээх учууталлар үөрэтэллэр. Кинилэри барыларын ааспыт Учуутал күнүнэн эҕэрдэлээн туран, кылааһым салайааччыта Зинаида Григорьевна туһунан кэпсиим. Кини — физкультура учуутала, Чурапчытааҕы физкультура уонна успуорт институтун бүтэрэн үөрэммит оскуолатыгар үлэлии сылдьар.
Зинаида Григорьевна биһиэхэ куруутун көмөлөһөр, санаабытын көтөҕөр. Кини кылааска элбэх араас бырааһынньыктары тэрийэр, холобур ким эмэ төрөөбүт күнэ буоллаҕына сылаас кэмҥэ тыаҕа тахсааччыбыт, онно араас оонньуулары ыытабыт, оттон кылаас чаастарыгар күрэхтэһэбит, викториналарга кыттабыт.
Быйыл күһүн акцияҕа кыттан кылааһынан отонноон ветеран учууталга биэрбиппит. Оттон «Кросс нации» күрэххэ уолаттар үс, кыргыттар икки бириистээх миэстэлэри ылбыппыт.
Биһиги үтүө санаалаах учууталбытын бары сөбүлүүбүт, киниэхэ махтанабыт!
Зинаида Григорьевна, куруутун үөрэ-көтө сырыт!
Рома Брызгалов, 6 кылаас үөрэнээччитэ,
Табаҕа орто оскуолата
Мэҥэ-Хаҥалас улууһа.