Сайын от үлэтэ саамай эппиэтинэстээх, элбэх сыраны-cылбаны эрэйэр үлэ. Былыр-былыргыттан сайынын оттоон кыһын сиир аспытын булунабыт.
Булуҥ улууһун Бороҕон орто оскуолатын үөрэнээччилэрин хорсун быһыыларын туһунан агрооскуола дириэктэрэ Жанна Прокопьевна Осипова кэпсээтэ.
Ол курдук Бороҕон орто оскуолатын улахан кылааһын уолаттара Матвей Никонов (11 кылаас), Андрей Стручков уонна Ринат Старостин (10 кылаас) сылын аайы оттуур биригээдэҕэ окко көмөлөһөллөр. Быйыл сүрдээх кураан дьыл буолан отчуттарга табыгастаах кэм.
Атырдьах ыйын 7 күнүгэр уолаттар бөһүөлэктэн тэйиччи сытар Эҥэ Күөлэ диэн оттуур сирдэригэр тиийэн, отторун бэрийэ сырыттахтарына, от охсо сылдьар биригэдьиирдэрэ Павел хаһыытын истэн сүүрэн тиийбиттэр. Киһилэрэ косилкаҕа атаҕын оҕустаран хаан сиин бөҕө буола сытарын көрөн, соһуйан-өмүрэн турбакка, атаҕын ыраас тэрээпкэнэн бобо баайан баран, квадроцикл үрдүгэр түһээт, балыыһаҕа ойутан аҕалан бырааска туттарбыттар. Онон уолаттар хорсун быһыыны оҥорон, чугас дьонноруттан, бөһүөлэк олохтоохторуттан, олохтоох дьаһалтаттан махтал тылларын иһиттилэр.
«Биһиги оскуолабыт оҕолорунан киэн туттабыт. Маннык тобуллаҕас өйдөөх, түргэн туттунуулаах оҕолор бааллара биһигини үөрдэр. Биригэдьиирбит Павел билигин туруга үчүгэй, улуус киинигэр Тиксиигэ санрейсынан киирбитэ», — диэн Жанна Прокопьевна иһитиннэрдэ.
Уолаттар уолуйан хаалбакка, биригэдьиирдэрин алдьархайтан өрүһүйэн, хорсун быһыыны оҥорбуттара барыбытыгар үтүө холобур буолар. Маладьыастар
Уопсай хаартыскаҕа уолаттар уҥа өттүгэр кытыыга тураллар.
Бэлэмнээтэ Анна Слепцова.