Бүгүн Бэс Күөлүн оҕолорун иккис бөлөҕө, уопсайа 60 оҕо, өрөспүүбүлүкэтээҕи оҕо сынньалаҥ уонна доруобуйатын бөҕөргөтөр «Бэс Чагда» киинигэр киирдилэр. Итиэннэ өссө эбии уон оҕо кэлэрэ күүтүллэр.
Онтон бэҕэһээ баһаарга эмсэҕэлээбит Горнай улууһун Бэс Күөл нэһилиэгин бастакы бөлөҕүн оҕолоро, барыта 18 оҕо, Краснодарскай кыраайга «Орленок» лааҕырга сынньана көппүттэрэ.
«Бэс Чагда» киинин үлэһиттэрэ бүгүн кэлбит оҕолорго «Бэйэҕэр итэҕэй» диэн оҕону эт-хаан, өй-санаа өттүнэн чэбдигирдэр анал бырагырааманы тэрийдилэр. Ол курдук сынньанааччылары эбии үөрэхтээһин чэрчитинэн араас хайысхалаах оҕону сайыннарар, доруобуйаларын бөҕөргөтөр куурустар, култуурунай-маассабай тэрээһиннэр, уйулҕа уруоктара, күҥҥэ 5-тэ толору иҥэмтиэлээх аһылык уо.д.а. бэртээхэй бырагыраама күүтэр. Лааҕыр үлэһиттэрэ хамсыгы бохсуу ирдэбилинэн бары ПЦР анаалыстаахтар.
«Кэлбит оҕолор бу сменаҕа чуҥкуйуо суохтара, хас биирдии оҕо сөбүлүүр дьарыгын хайаан да булуоҕа, саамай сүрүнэ — биһиги оҕолор доруобуйаларын бөҕөргөтүүгэ ууруохпут», — дииллэр киин үлэһиттэрэ.
Оҕолору кытары Саха сирин үөрэххэ уонна наукаҕа миниистирэ Михаил Сивцев көрүстэ, үтүө уонна туһалаах сынньалаҥ ааһарыгар барыларыгар туһаайан баҕа санаатын эттэ.
Санатар эбит буоллахха, СӨ Ил Дархана Айсен Николаев атырдьах ыйын 8 күнүнээҕи Горнай улууһун Бэс Күөлүн нэһилиэгэр баһаартан эмсэҕэлээбиттэри өйүүр миэрэлэрин дьаһалынан олохтоох оҕолор доруобуйаларын тупсара, эт-хаан, өй-санаа өттүнэн чэбдигирэ уонна бөҕөргүү өрөспүүбүлүкэ, маны таһынан Арассыыйа оҕо сынньанар кииннэригэр бардылар.
Бүгүн «Бэс Чагдаҕа» киирбит оҕолор атырдьах ыйын 30 күнүгэр диэри сынньаныахтара.
Анна СЛЕПЦОВА.