21-с Манчаары оонньууларын көрсө Бэрдьигэстээх сэлиэнньэтигэр араас хайысхалаах быыстапкалар киэҥ көстүүгэ турдулар. Биир оннук ураты быыстапканан Духуобунас киинигэр тэриллибит СӨ култууратын үтүөлээх үлэһитэ, Горнай улууһун бочуоттаах олохтооҕо, Россия суруналыыстарын сойууһун чилиэнэ, улуус чемпион от охсооччута Василий Ильич Алексеев хаартысканан быыстапката буолар. Василий Ильич өр кэмнэргэ улуустааҕы «Үлэ күүһэ» хаһыакка сүрүн редакторынан үлэлээбитин өрөспүүбүлүкэбит олохтоохторо бары бэркэ диэн билэн олоробут.
Василий Ильич отой кыратыттан, оскуолаҕа үөрэнэр эрдэҕиттэн хаартыскаҕа түһэриинэн умсугуйан туран дьарыктаммыта. Онтон Маатта үрэх кини таптаан сылдьар, сынньанар, күүс-уох эбинэр сиринэн буолар. Редакцияҕа үлэлиир кэмигэр олохтоохтор таптаан сынньанар үрэхтэрэ ыраас, кэрэ, тупсаҕай көстүүлээх буоларыгар элбэх тэрээһиннээх үлэни ыыппыта.
Оройуон кырдаҕастарын кэпсээннэрин истэн, Мааттаҕа кыталык үҥкүүлүүр кырдалыгар «Бэрдьигэстээх барахсан» диэн ырыаҕа анаммыт сквер тутулларын аан бастыканан кини көҕүлээбитэ. Билиҥҥитэ бу сир өссө эбии кэҥээн, тупсан олохтоохтор сөбүлээн сынньанар биир бастыҥ сирдэринэн буолла.
Василий Ильичка чэгиэн доруобуйаны, айар үлэтигэр ситиһиилэри, айымньылаах олоҕу баҕарабыт.
Бэлэмнээтэ Анна СЛЕПЦОВА.