1969 с. В. И. Ленин төрөөбүтэ 100 сылынан сибээстээн “Бэлэм буол” хаһыат редакцията бары оскуолаларга юнкоровскай поcтары тэрийэри биллэрбитэ. Мэҥэ-Хаҥалас оройуонун Балыктах орто оскуолатыгар 1970 сыллаахха пуоһу тэрийэригэр Парасковья Прокопьевна Габышеваны сорудахтаабыттара. Билигин кини 90-ча саастаах. РСФСР үөрэҕириитин туйгуна, “Учууталлар учууталлара”, Саха республикатын үөрэҕин систематын Бочуоттаах бэтэрээнэ, Мэҥэ нэһилиэгин, Мэҥэ Хаҥалас оройуонун Бочуоттаах олохтоохторо. Эдэр кэрэспэдьиэннэри кытта үлэтин туһунан ахтыытын ааҕыҥ.
Биһиги пуоспут 4 №-дээх этэ. Кэлин саҥалыы регистрациялааһыннарыгар 11 №-дээх буолбута. Пост эмблемалаах, девизтээх буолуохтааҕа. Пост девиһэ: «Күн сири сырдатар, үөрэх-киһини» диэн этэ. Эмблематын оҕолор бэйэлэрэ уруһуйдаабыттара.
«Бэлэм буол” редакцията хас биирдин юнкорга дастыбырыанньа уонна значок биэрэр этэ.
Поска оҕолор көхтөөхтүк кыттыбыттара. Мин поһу 1970 сылтан, үлэттэн тохтоон, 2002 сыллаахха биэнсийэҕэ тахсыахпар диэри салайбытым. Оҕолор хаһыакка суруйалларыгар көмөлөһүннэрээри, «Эдэр юнкор» диэн куруһуогу үлэлэппитим. Манна суруйуу араас көрүҥнэрин үөрэтэрим, оҕолор өйдүүллэрин курдук холобурдуурум. Редакция юнкордар суруйуулара кырдьыкка олоҕурбут, табатык, ыраастык, үчүгэй буочарынан сурулларын ирдиирэ.
Юнкордар «Бэлэм буол» кэлин “Кэскил» сорудахтарын барытын толорор этилэр. Ону таһынан араас куонкурстарга, өйтөн суруйууларга, ирдэбил үлэлэргэ кытталлара. Элбэх заметканы, ыстатыйаны, интервьюну суруйаллара, хаһыакка тахсыбыттарын кырыйан ылан, альбомҥа сыһыаран иһэрим. Ол барыта мунньуллан, 4 улахан альбом буолбутун оскуола мусуойугар туттарбытым билигин да баар, маны барытын аахтахха, оскуола урукку олоҕун туһунан элбэҕи билиэххэ сөп. “Бэлэм буол» редакцията таһаарбыт «Сэрии дуораана» диэн кинигэҕэ Мохначевская Таня, Габышева Таня сэрии ветераннарын туһунан историялара бэчээттэмитэ.
Пуоска сылдьыбыт оҕолор үксүлэрэ пионерскай, комсомольскай үлэ активистара, үчугэй үөрэхтээх этилэр. Ол курдук, Аня Дьячковская 4-с республикатааҕы рабселькордар слеттарыгар кыттыбыта, «Артек» лааҕырга сынньаммыта. Юнкордар Аня Свинобоева, Зоя Харитонова «Бэлэм буол» хаһыат 50 сылын туолар үбүлүөйүгэр сылдьыбыттара, «Бочуотунай грамотанан» наҕараадаламмыттара, оттон миэхэ, салайааччыга, эмиэ Бочуотунай грамота уонна «Бэлэм буол-50 сыл” диэн суруктардаах чороону бэлэхтээбиттэрин аҕалан туттарбыттара.
Юнкор Оксана Харитонова үөрэх туйгуна буолан «Володя Ульянов дневнигар» киирбитэ, оттон Вика Габышева, Катя Говорова пионерскай үлэҕэ активнайдык кытталларын иһин комсомол Киин комитетын бэлиэтинэн наҕарадаламмытара.
«Сардаҥа” пост республикаҕа биир бастын үлэлээҕинэн биллибитэ, үгүстүк Бочуотунай грамотанан наҕараадаламмыта, «Бэлэм буол», “Кэскил» хаһыаттар путевкаларыннан 8 юнкор наҕараадаланан «Артек», «Орленок», «Океан» лааҕырдарга сынньаммыттара. Прибылых Яна Францияҕа, Стручкова Уля Англияҕа баран экскурсиялаан кэлбиттэрэ.
11 №-дээх «Сардаҥа» пост үчүгэй үлэтин иһин комсомол Мэҥэ-Хаҥаластааҕы райкомун Бочуотун кинигэтигэр киллэриллибитэ.
В.И.Ленин төрөөбүтэ 100 сылыгар 1970 сыллаахха “Бэлэм буол» хаһыакка «Володя Ульянов дневнигэ» тэриллибитэ, манна бастыҥ үөрүнээччилэр киирэллэрэ. Биһиги оскуолабыттытан Митя Кычкин, Костя Соловьев, Айта Решетникова, Оксана Харитонова, Валера Сотников, Инара Татаринова, Маша Богимова киирбиттэрэ. В.И.Ленин төрөөбүтэ 100 сылынан сибээстээн, оскуолаҕа элбэх үлэ ыытыллыбыта, үөрэххэ, иитиигэ саҥа көрүҥнэр, ньымалар киирэн, сэргэхсийиини таһаарбыттара.