Коронавирус дьаҥа туран, үөрэх тэрилтэлэригэр, оскуолаларга саҥа, ураты ирдэбиллэр турдулар. Сарсыарда оскуолаҕа киирииттэн саҕалаан, кылааска хайдах олоруохтарыгар тиийэ бары санитарнай миэрэлэри Дьокуускай 17 №-дээх оскуолатыгар хайдах тутуһалларын туһунан 4 «в» кылаас үөрэнээччитэ Туйаара Третьякова хаартыскалаах суругунан кэпсиир.
Доруобуйабыт туһугар быраабыланы тутуһуохха!
Коронавирус ыарыы туран, ааспыт үөрэх дьылын бүтүүтэ дьиэбитигэр үөрэммиппит. Бу үөрэх дьылыгар кылааспыт оҕолорун ахсаанынан аҥардаан, оскуолаҕа күн өрүү-өрүү баран үөрэнэбит. Онон кылааһым сорох оҕолорун, доҕотторбун көрбөтөҕүм да олус ыраатта.
Ковид-19 ыарыы пандемията аан дойду үрдүнэн турбута олус куһаҕан. Урут үөрэ-көтө сылдьар куруһуоктарбын, үҥкүү, хомус дьарыктарбын, доҕотторбун кытта былассааккаҕа оонньуурбун олус суохтуубун.
Оскуолаҕа сылдьыы саҥа быраабылаларын үөрэх маҥнайгы күнүгэр учууталларбыт наһаа үчүгэйдик быһаарбыттара. Ол быраабылалар манныктар:
Кылаастар тус-туспа аанынан киирэллэр. 
Биһиги оскуолабыт 3 киирэр ааннаах.
Оҕо киирээтин кытта, аан аттыгар тута температуратын мээрэйдииллэр.
Сүрүн киирэр ааҥҥа тепловизор турар. 
Этээс аайы көрүдүөргэ антисептиктаах дозатордар бааллар.
Остолобуойга кылаас аайы туспа остуол анаммыт уонна тэйиччини тутуһар бэлиэлэр тардыллыбыттар.
Кылааска паартаҕа соҕотохтуу олоробут. Сынньалаҥҥа (переменаҕа) көрүдүөргэ тахсыбаппыт, кылааспыт иһигэр олоробут. 
Коронавирус түргэнник бүтэрин туһугар дьон бары доруобуйаны харыстыыр боростуой быраабылалары тутуһуохтаахпыт: маасканы кэтэбит, илиибитин сууна сылдьабыт, элбэх дьон мустар сиригэр сылдьыбаппыт. Бары доруобай буолуҥ, ыалдьымаҥ!