Мин, Никита Яковлев, Дьокуускай куоракка олоробун. Биһиги бу сайын дьиэ кэргэнинэн, аҕам, ийэм уонна балтым Вика буолан, массыынан Владивостокка баран кэллибит.
Сыалбыт диэн карантин атын регионнарга хайдах дьайбытын билээри, олох-дьаьах хайдах уларыйбытын көрөөрү, табаар сыанатын тэҥнээри. Уонна, биллэн туран, муораҕа сөтүөлээри, сынньанаары!
Барыах иннинэ төгүрүк остуол тула олорон, «тугунан барабыт» диэн мунньахтаабыппыт. Сөмөлүөт, поезд сыанатын тэҥнээн көрөн баран, массыынанан барарга санаммыппыт.
От ыйын 18 күнүгэр айаҥҥа туруммуппут. Бастакы түүммүтүн Томмокко хоммуппут, мин балтыбыныын массыынаҕа, ийэлээх аҕабыт балааккаҕа утуйбуттара.Иккис күммүтүгэр Саха сириттэн тахсан, Амурскай уобалас Сковородино куоратыгар тиийэн хоммуппут.
ҮҺүс күммүтүн Благовещенскай куоракка гостиницаҕа түһэн, суунан-тараанан, куорат болуоссаттарын кэрийбиппит, Зея өрүскэ сөтүөлээбиппит. Благовещенскайга үгүс маҕаһыын коронавирус карантиныттан сылтаан эстибиттэр, хаалбыт маҕаһыыннар табаардарын атыылыы сатаан сыаналарын улаханнык түһэрэн атыылыы тураллар этэ.
Айаннаабыппыт бэһис күнүгэр Владивостокка тиийэн, балааккабытын муора кытылыгар туруорбуппут. Пляжка Бурятияттан, Иркутскайтан, Читаттан, Хабаровскайтан, Биробиджантан элбэх дьон кэлэн, сынньаналлар эбит.
Владивостокка эт, үүт сыаната Саха сиринээҕэр ыарахан эбит. Былырыыҥҥыга тэҥнээтэххэ, оҕуруот аһа улаханнык ыараабыт.
Айаммыт тухары балтыбыныын ороскуоппутун сурунан истибит, ол эбэтэр: бэнсиин, аһылык, гостиница сыаналарын. Ону бу таблицаҕа көрүөххүтүн сөп:
Расходы на 4-х человек в поездке на машине по маршруту Якутск — Владивосток | ||||
литр | цена | итого | ||
АЗС | Бензин 92 | 218л | 46,6 | 10158 |
Еда | Продукты+кафе | 7000 | ||
Паром | Якутск-Нижний Бестях | 700 | ||
Прочее | Всякие мелкие расходы | 1000 | ||
Гостиница | Благовещенск | 1400 | ||
Итого | 20258 |
Уопсайа, 22 күн сырыттыбыт, ол тухары 70000 солкуобайы бараатыбыт.
Айаммыт бүтүүтүгэр маннык тумуккэ кэллибит:
Массынанан сылдьан киһи элбэх куораты, сири көрөр, баҕарбыт сиригэр тохтуур, сынньанар, элбэх интэриэһинэйи билэр. Интернет хаппат буолан, төлөпүөн диэҥҥин умнаҕын, дьоҥҥун кытта кэпсэтэрин, ыллыырын, оонньуурун элбиир. Ханна да тохтоотоххуна, саҥа дьону кытта билсэҕин, сонуннарын истэҕин.
Мин бу сырыыбын олус сөбүлээтим, өссө даҕаны барыахпын баҕарабын.
Ааптар: Никита Яковлев, 5 кылаас, 25 №-дээх оскуола.
Дьокуускай.