Быйыл Ньурба улууһун Хаҥалас оскуолатын бүтэрэр биэс үөрэнээччибит үөрэхтэрин ситиһиилээхтик түмүктээн эрэллэр.
Быйылгы уол бииристэр — оскуола биир түмсүүлээх, талааннаах, спортивнай кылааһа. Научнай чинчийэр үлэнэн дьарыктанан, предметнэй олимпиадаларга оскуола чиэһин элбэхтик көмүскээбиттэрэ. Нэһилиэк, улуус общественнай олоҕо кинилэрэ суох ааспат. Оҕолор эт-хаан өттүнэн чэгиэн, сайдыылаах буолан, спортка уһулуччу ситиһиилээхтэр. Тенниһинэн, саанан ытыынан, волейболунан утумнаахтык эрчиллэн, оскуола, нэһилиэк, улуус чиэһин ситиһиилээхтик көмүскүүллэр.
Аҕыйахпыт диэбэккэ, араас маассабай дьаһалларга, күрэхтэргэ көхтөөхтүк кытталлар. Бу кылаастан “Ыллык” эдкорпост үс бастыҥ кэрэспэдьиэнэ тахсыбыта: Аммосов Саша, Васильев Володя уонна Третьякова Юля. Оҕо эрдэхтэриттэн хаһыаты кытта доҕордоһуулара кинилэри үөрэххэ да, уопсастыбаннай олоххо да инники күөҥҥэ сылдьарга сирдээбитэ. Пост салайааччыта — маҥнайгы учууталлара, Саха республикатын үөрэҕириитин туйгуна Алексеева Прасковья Николаевна.
Оҕолор уон биир сыл устата элбэх учууталларга уһуйуннулар. Хас биирдии учуутал кинилэргэ бэйэтин сыратын, сүрэҕин сылааһын биэрэн, дууһатын арыйан, үөрэттэ-ииттэ. Кинилэр сыралаах үлэлэрэ оҕолор бары өттүнэн дэгиттэр сайдыыларыгар төһүү күүс, сүрүн олук буолар.
Третьякова Юлия — үөрэҕэр үчүгэй, сайдам санаалаах, эйэҕэс майгылаах, уопсастыбаннай олоххо көхтөөхтүк кыттар бастыҥ үөрэнээччибит. Алын сүһүөхтэн саҕалаан, «Кэскил» хаһыакка эдкордаата. 2016 сыллаахха «Бэлэм буол» — «Кэскил» хаhыат 80 сыллаах үбүлүѳйүгэр анаммыт ”Бэлэм буолтан” – “Кэскилгэ” НПК «Кэскилтэн саҕалаан» үлэтэ дипломунан наҕараадаламмыта. 2018 с. “Бэргэн” оҕо прессатын агентствотын “Фоторепортаж” сорудаҕар ситиһиилээхтик кыттан, кыайыылааҕынан тахсан, Бүтүн Россиятааҕы «Океан» оҕо киинигэр барар путевканан наҕараадаламмыта. Юля кыра оҕо сааһыттан үөрэххэ, үлэҕэ эппиэтинэстээхтик сыһыаннаһар. Улуустааҕы предметнэй олимпиадаларга бириистээх миэстэлэрдээх. Остуол тенниһигэр ситиһиилэрдээх. Ону тэҥэ, үҥкүү, «Ай-Куо» оҕо муода театрыгар дьарыктаммыта. Аан дойдутааҕы таһымнаах «Бриллиантовые нотки» куонкуруска кыттыбыта.
Аммосов Саша үөрэҕэр үчүгэй, алын сүһүөхтэн саҕалаан, араас тэрээһиннэргэ ситиһиилээхтик кыттар. 2016 сыллаахха «Бэлэм буол» — «Кэскил» хаhыат 80 сыллаах үбүлүѳйүгэр анаммыт НПК «Утум салҕанар» дакылаата биһирэммитэ. Норуоттар икки ардыларынааҕы «Азия оҕолоро» VI-c спортивнай оонньууга СМИ спортивнай күрэхтэһиилэр түмүктэрин сырдатар пресс- кииҥҥэ волонтерунан үлэлээн, айар дьоҕурун сайыннарбыта. «Кэскилтэн» Бүтүн Россиятааҕы «Океан» оҕо киинигэр барар путевканан наҕараадаламмыта. 2018 үөрэх сылыгар Алма-Ата куоракка омук тылыгар, математикаҕа, программированияҕа үөрэнэн, дьарыктанан кэлбитэ. Саша үөрэҕэр, спортка о.д.а. араас хайысхаҕа ситиһиилэрин, ураты көрдөрүүлэрин иһин Ил Дархан харыйатыгар кыттыбыта.
Васильев Володя үөрэҕэр үчүгэй, математикаҕа дьоҕурдаах. Сылын аайы араас таһымнаах интеллектуальнай олимпиадаҕа, кэмпириэнсийэҕэ көхтөөх кыттыыны ылар. Алын сүһүөхтэн «Ыллык» пост эдэр кэрэспэдьиэнэ. 2015 с. өрөспүүбүлүкэ оччолорго Ил Дархана Е. А. Борисов пресс- кэмпириэнсийэтигэр кыттыыны ылбыта. Володя «Патриот» байыаннай- патриотическай кулууп бастыҥ курсанынан буолар. Сылын ахсын ыытыллар “Снежный барс” оонньууга хамаанданан ситиһиилээхтик кытталлар. Дүллүкү парашютнай оскуолатыгар үөрэнэн, сөмөлүөттэн үс (!) төгүл парашюттаах ыстаммыта. «Десантник» кулууп иитиллээччитэ. Владивосток 30926 №-дээх байыаннай чааһыгар уопсай бэлэмнэниини аапыта. Буулдьанан ытыыга улуус сүүмэрдэммит хамаандатын чилиэнэ. 2017 с. “Манчаары оонньууларыгар” кыттан, 1 разряды ылбыта. 2019 с. “Золотое кольцо России” билии-көрүү маршрутунан айаннаан кэлбитэ.
“Кэскил”оҕо хаһыатын үлэһиттэригэр, бастакы учууталбытыгар, Прасковья Николаевнаҕа, оҕолорбут “Кэскил” издательство көмөтүнэн улахан тэрээһиннэргэ кыттан, суруналыыстыка эйгэтигэр сүҥкэн билиини ылбыттарыгар кылаас төрөппүттэрэ махталбытын тиэрдэбит!
Кылаас төрөппүттэрэ