Алтынньы 28 күнүгэр өрөспүүбүлүкэ киинигэр, СӨ Худуоһунньуктарын сойууһун дьиэтигэр, саха үөлүллүбүт соботун буһарыы үгэс буолбут технологиятын билиһиннэрии буолла. Тэрээһин «Саха Өрөспүүбүлүкэтин норуоттарын материальнайа суох этнокултуурунай нэһилиэстибэлэрин эбийиэктэрин ойуулааһын ньымата» диэн сэминээр-практикум чэрчитинэн ааста.
Санатар буоллахха, быйыл Кэбээйи улууһугар Олоҥхо ыһыаҕар Саха Өрөспүүбүлүкэтин Ил Дархана Айсен Николаев Кэбээйи улууһун баһылыгар Иван Левиҥҥэ эбийиэги Реестрга киллэрии туһунан туоһу суругу туттарбыта. Онон Худуоһунньуктар дьиэлэригэр буолбут презентация – бу ситиһиини Дьокуускай олохтоохторугар уонна уопсастыбаҕа билиһиннэрии буолла.
Билиһиннэриини арыаллыыр быыстапка дьону сөхтөрдө: ыалдьыттарга 30-ча араас соботтон астаммыт бүлүүдэ, ол иһигэр аныгы айымньылар (собо тылыттан салаат, собо искэҕиттэн алаадьы), ону тэҥэ уҥуохтан уонна хатырыгыттан оҥоһуллубут ураты оҥоһуктар көрдөрүлүннүлэр.
Үс эспиэр дакылаат аахта:
— Константин Степанов, тыа хаһаайыстыбатын билимин дуоктара. «Саха норуотун аһылыгын устуоруйата уонна култуурата» диэн дакылаатыгар саха собото сыатын, микроэлэмиэннэрин уонна битэмииннэрин таһымынан атын эрэгийиэннэр соболоруттан быдан туһалааҕын, онон хотугу норуоттар доруобуйаларыгар стратегическэй суолталааҕын бэлиэтээтэ.
— Евгений Эверстов, ОБЗР учуутала. Кини видео-ырыссыабы көрдөрдө уонна аһы сымнаҕас буоларын туһугар уоту уонна маһы сөпкө талыы курдук үөлүллүбүт собону буһарыы үгэс буолбут технологиятын кистэлэҥнэрин арыйда.
— Татьяна Аммосова, Танара оскуолатын научнай-чинчийэр үлэҕэ дириэктэри солбуйааччы. Кини «Хаһаайыстыба үөрүйэҕин иҥэрии – балыктааһын холобуругар» диэн дакылааты кэпсээтэ.
Эспиэрдэр сэртипикээти ылыы уонна Реестрга киирии – бу технологияны умнуллууттан харыстыырга сүҥкэн хардыы диэн биир санааҕа кэллилэр. Бу үлэ кэнчээри ыччакка култуураны сөптөөхтүк тиэрдэргэ уонна үрдүк таһымнаахтык оҕону иитэр-үөрэтэр суолталааҕын бэлиэтээтилэр.
Кэскил14.ру