Учуутал күнүн чэрчитинэн оскуолаҕа учууталларга анаммыт ураты айар тэрээһин — «Сэбиэскэй учуутал биир күнэ» буолан ааста. Наставник учууталлар биир идэлээхтэригэр дьиҥнээх бырааһынньыгы бэлэмнээн, барыларын Сэбиэскэй Сойуус кэмигэр эргиттилэр.
Сэбиэскэй учуутал биир күнэ хайдах саҕалананыаҕыттан бүтүөр диэри барытын сиһилии көрдөрөн тэрээһин ордук сэргэхтик саҕаланна. Быыстапкага 80-90 сылларга илиинэн суруллубут уруок кэнспиэктэрэ, каллиграфическай буочардаах эргэ тэтэрээттэр, уруок былааннара, араас дьикти дьэрэкээн коллекциялар бааллар. Оччотооҕу кэмҥэ компьютер саҥа үөдүйэн эрэр кэмэ буолан, учуутал барытын бэйэтэ толкуйдаан, илиинэн суруйан, килиэйдээн оҥорорун Валентина Семеновна, оскуола дириэктэрэ, Анна Егоровна, биология учуутала кэпсээтилэр. Уһуйааччылар учуутал улэтин кытта, бэйэлэрин иллэҥ кэмнэригэр дьарыктарын көрдөрдүлэр. Улахан интэриэһи уһуйааччылар сынньалаҥнарыгар илиинэн тигиллибит таҥастар, баайыы, оҕуруонан оҥоһуллубут нарын киэргэллэри уонна оҥоһуктары, оскуола оҕолоро кэтэн киэргэттилэр.
Ону таһынан уһуйааччылар муспут баай кэллиэксийэлэрэ: ручкалар, слоннар, манньыаттар, аккырыыккалар, мэтээллэр, таас статуэткалар, чуорааннар дьон болҕомтотун тарта.
Уһуйааччылар биир идэлээхтэригэр тэтимнээх үҥкүүнү, бэйэлэрин үлэлэриттэн айан көрдөөх сыаҥкалары көрдөрөн, учуутал мэлдьи артыыс буоларын санаттылар.
Уһуйааччылар уонна эдэр учууталлар бэйэ-бэйэлэрин кытта ирэ-хоро кэпсэттилэр, санааларын атастастылар уонна оскуола олоҕуттан интэриэһинэй түбэлтэлэри ахтан-санаан аастылар.
«ССРС-ка төрөөбүттэр» тэрээһин ааспыты уонна билиҥҥини ситимниир далаһа буолла. Учуутал — бу идэ эрэ буолбатах, бу муударас, тулуур уонна оҕолорго улахан таптал, ханнык да кэмтэн уонна технологиялартан тутулуга суох.
Эвелина Курбатова,
оператор Захар Ботусов,
«Ориентир» медиакиин эдэр кэрэспэдьиэннэрэ
Г.И. Чиряев аатынан Бүлүү 1-кы №-дээх орто оскуола