Ыам ыйын 9 күнүгэр Нөмүгү нэһилиэгэр Улуу Кыайыы 81 сылын бэлиэтиир өрөгөйдөөх парад буолан ааста. Бу күн – сэрии толоонугар хорсуннук сэриилэспит, тыылга күүстээх үлэни оҥорбут, биһиэхэ эйэлээх олоҕу бэлэхтээбит дьоммут ааттарын үйэтитэр уонна кинилэргэ барҕа махталбытын биллэрэр күн. Нэһилиэк уулуссатынан «Өлбөт үйэлээх полк» хаамыыта ыытыллан, кырдьыгы, эйэни тутуһууга ыччаппытын үөрэттэ. Бу күн дьон-сэргэ, оҕоттон улахан дьоҥҥо тиийэ, илиилэригэр чугас дьоннорун хаартыскаларын тутан, кинилэр хорсун быһыыларын ахтан-санаан аастылар.
Нөмүгү нэһилиэгин олохтоохторо бу күнү хайдах ылыналларын, тугу саныылларын туһунан маннык кэпсээтилэр:
Обутова Наталья Егоровна кэпсиир:
Кыайыы өрөгөйдөөх күнүнэн Нөмүгү нэһилиэгин олохтоохторун эҕэрдэлиибин! Биһиги дьиэ кэргэн бу ыам ыйын 9 күнүгэр үгэстээхпит. Бары дьиэ кэргэн буолан мустан, аҕабытын Кириллин Егор Егоровиһы, Аҕа дойду сэриитин бэтэрээнин, уонна ийэбитин Кириллина Татьяна Петровнаны бары ахтан-санаан ааһар күннээхпит. Ол иһин бары бу бырааһынньыкка куруук кыттыһабыт. Холобур, бэҕэһээ (ыам ыйын 8 күнүгэр), Свеча Памяти ууран барбыппыт. Дьоммутун ахтан-санаан, биһиги бу үчүгэй олоххо олорорбут туһугар сэриигэ кыттан кэлбиттэрин куруук ахта-саныы сылдьабыт. Уонна ханнык да үйэ буолбутун иһин, историяны уларыппакка, кырдьыгынан оҕолорго, оскуола оҕолоругар үөрэтэллэригэр баҕарабыт. Оҕолорбут бары патриот буолан, Нөмүгүлэрин куруук таптаан, харыстаан, көмөлөһө сылдьалларын баҕарабын. Ону таһынан районнарын, республикаларын куруук харыстыы сырыттыннар. Куруук эйэлээх халлаан буоллун, сэрии тохтоотун уонна сэриигэ сылдьар оҕолор этэҥҥэ эргиллэн кэллиннэр!
Кельциева Клавдия Гаврильевна эһэтин туһунан:
Өлбөт үйэлээх полк Улуу Кыайыы бырааһынньыгар биһиги дьоммутун, өбүгэлэрбитин үйэтитэр акция буолар. «Ким да умнуллубат, туох да умнуллубат» диэн девиһи тутуһан, бүгүн мин эһээм туһунан кэпсиэҕим. Бу мин эһээм Кельциев Гаврил Степанович – уоттаах сэриигэ 1943 сыллаахха ыҥырыллан, сэриини Берлин куоракка 1945 сыллаахха бүтэрбитэ. Ол кэнниттэн Кёнигсберг уонна Япония сэриитин кыттыылааҕа. Бииргэ төрөөбүт 4 бырааттыылар бары сэрии кыттыылаахтара. Иккис быраата Василий Степанович Япония сэриитин кыттыылааҕа, үһүс быраата Ефим Степанович Сталинград кыргыһыытын кыттыылааҕа, уонна төрдүс бырааттара, кыра уоллара Николай Степанович Илмень күөл ылыытыгар хорсун быһыытынан сураҕа суох сүппүтэ. Ини-бии оҕолоро уопсайынан 9 Кельциевтэр сэриигэ кыттыбыттара. Онон, биһиги аймахха туох баар улахан сэриилэр суоллара баар.
Парфёнов Дмитрий Васильевич таайын туһунан:
Мин кэпсиир киһим Корякин Николай Иннокентьевич уоттаах Аҕа дойду Улуу сэриитин кыттыылааҕа, «За отвагу» 4 мэтээллээх. Мин 10 кылааһы бүтэрэн баран, биир сыл устата кинилиин котельнайга хачыгаарынан үлэлээбитим. Кини мин таайым – аймаҕым буолар. Бииргэ үлэлии сылдьан дуоматтыыр, шахматтыыр этибит. Сэрии туһунан ыйыттаахха олох тугу да кэпсээбэт этэ, кистиир курдуга. Билигин кэлэн киһи соҕор эбит: сыалай «За отвагу» 4 мэтээллээҕэ элбэҕи кэпсиир. Биһиги киэн туттабыт, кини биһиэхэ холобур буолар уонна кинини өйдүү-саныы сылдьабыт. Киниэхэ махтанабыт, кини сэриигэ сылдьан биһиэхэ маннык олоҕу бэлэхтээбит буоллаҕа диэн.
Бу кэпсээннэр, киһи сүрэҕин долгутар түгэннэр, Улуу Кыайыы дьиҥнээх суолтатын өссө дириҥэтэллэр. Нөмүгү нэһилиэгин олохтоохторо хорсун өбүгэлэрин аатын үйэтитэр уонна кэлэр көлүөнэлэргэ тиэрдэр улахан үлэни ыыталлар. Биһиги умнубаппыт, киэн туттабыт! Эйэ олоҕо үйэлэргэ салҕаннын!
Иванна МОРДОВСКАЯ, ХI кылаас,
Ой орто оскуолата, Хаҥалас улууһа