Ыам ыйын 9 күнэ – Улуу Кыайыы күнэ. Киһи аймахха дириҥ өйдөбүллээх, өрөгөйдөөх күн! Быйыл – Аҕа дойду Улуу сэриитэ түмүктэммитэ 81 сыла! Бу күн бүтүн Арассыыйа үрдүнэн сэлэлии хаамыы ыытылынна.
Лөгөй нэһилиэгиттэн 144 эр киһи Аҕа дойду Улуу сэриитигэр ыҥырыллан Ийэ дойдуларын көмүскүү барбыттара, онтон 74 буойун олоҕун толук уурбута. Бу буойуттар сырдык кэриэстэригэр Кыайыы 81 сылыгар күргүөмүнэн Кэптэнибит көбүс-көнө уһун, киэҥ уулуссалаларынан сэлэлии хаамтыбыт. Кыайыы параадын Кэптэни бөһүөлэгин олохтооҕо Михаил Колодезников иилээн-саҕалаан ыытта.
Сэлэлии хаамыы кэнниттэн кыайыы болуоссатыгар үөрүүлээх миитин буолла. Миитини П.П. Оҕотоойоп аатынан сынньалаҥ киинин уус-уран салайааччыта Варвара Фёдорова уонна дириэктир Владимир Прядзеников ииллэн-саҕалаан ыыттылар.
Бу күн эмиэ да курус, эмиэ да үөрүүлээх. Хаһыс да сылын «Өбүгэ аһа» түмсүү миитин кэмигэр «саллаат хааһыта» диэн байыаннай куухуна үлэлэттэ. Кыайыы болуоссатыгар биһиги бары эйэлээх олоххо олорорбут туһугар олохторун толук уурбут анал байыаннай дьайыы кыттыыллаахтарын ааттарын, сырдык мөссүөннэрин үйэтитэр өйдөбүнньүк баннердар тураннар Кыайыы параадын бары кыттыылаахтарын ордук долгуттулар.
Парад уонна миитин кэннэ Кэптэни бөһүөлэгин түөлбэлэрин икки ардыларыгар Лөгөй нэһилиэгин ытыктанар, убаастанар РФ спордун бэтэрээнэ, Саха сирин физкультураҕа уонна спорка үтүөлээх үлэһитэ, Уус Алдан улууһун уонна Лөгөй нэһилиэгин бочуоттаах олохтооҕо Григорий Констанович Дьячковскай аатынан «Кыайыы эстафета» тэриллэн ыытылынна.
Тыҥааһыннаах киирсии түмүгэ:
1-кы миэстэ – «Сардаҥа» түөлбэ
2-с миэстэ – «Сарыал» түөлбэ
3-с миэстэ – «Саһарҕа» түөлбэ
4-с миэстэ – «Төлөн» түөлбэ
ХХ үйэ алдьархайын тохтоппут, Улуу Кыайыыны уһансыбыт хас биирдии саха саллаатын сырдык мөссүөнэ, албан аата эйэлээх ХХI үйэҕэ олорор, айар-тутар Саха сирин эдэр дьонун өйүгэр-санаатыгар, сүрэҕэр-быарыгар дьоһун дьоруой быһыытынан хаалыа диэн эрэнэбит!
Янис СЫСОЛЯТИН, VIII кылаас
Николай МАЛЫШЕВ, X кылаас, хаартыскаҕа түhэриитэ
Лөгөй лиссиэй-интэринээтин «Legmedia» пресс-киинин юнкордара, Уус Алдан