Лөгөй оскуолата араас интэриэһинэй бырайыактары тэрийэр ураты тыыннаах. Ол курдук, оҕо талаанын сайыннарар, арыйар биир астык тэрээһининэн Лөгөй орто оскуолатын Саргылаана Протодьяконова, Мария Кириллова кылаас салайааччылардаах 2006 сыллааҕы выпускниктара аан бастаан тэрийбит «Умнуллубат онус кылаас» бырайыактара буолар.
Быйыл, муус устар 18 күнүгэр, лиссиэйбит 10 “а” уонна 10 “б” кылаастара, ол эбэтэр «ЛӨГӨЙ ЭРЭЛЛЭРЭ» хамаанда бэрт сэргэх, ураты, аныгылыы кэнсиэри тэрийэннэр, бөһүөлэк олохтоохторо сэргэхсийдилэр. Бу күн оҕолор бу иннинэ киэҥ эйгэҕэ биллибэтэх талааннарын көрдөрдүлэр, дьон сөҕө-махтайа көрдүлэр, иһиттилэр. Онон куруук инникигэ эрэллээх ыччаппытынан киэн туттабыт. Өрүү буоларын курдук саала иһэ тобус-толору көрөөччү буолан, ытыс тыаһа ньиргийэн олордо.
Түмүккэ лиссиэйбит дириэктэрэ Михаил Пухов уонна иитэр үлэҕэ дириэктэри солбуйааччы Марианна Хабарова үрдүк сыанаттан 10-с кылаас оҕолоругар уонна кылаас салайааччыларыгар Надежда Бурнашеваҕа, Алексей Бережневка эҕэрдэ, махтал тылларын анаатылар уонна бу бырайыагы аан бастаан олоххо киллэрбит 2006 сыллааҕы выпускниктартан харчы бэлэҕи туттардылар, маны тэҥэ бүтүн оскуола аатыттан минньигэс аһы уонна утаҕы бэлэх ууннулар.
«Умнуллубат онус кылаас» бырайыак тиһигин быспакка ыытылла турарыгар!
Янис СЫСОЛЯТИН, SiTiM LegMedia киин юнкора
Видеоны оҥордо: Саскылаана МАЛЫШЕВА, SiTiM LegMedia киин юнкора