Олунньу 18 күнүгэр Дьокуускайдааҕы 31-с орто оскуолатыгар истиҥник күүтүллүбүт тэрээһин буолан ааста — 4 «А» кылаас үөрэнээччилэрэ кукольнай театр остуоруйатын туруордулар. Бу күн оҕолор, төрөппүттэр, эбээлэр уонна учууталлар биир сомоҕо буолалларын көрдөрдө.
Спектакль кэнниттэн кылаас үс үөрэнээччитэ бэйэлэрин санааларын үллэстилэр.
Егоров Эрэл куукуланнан салайыы чэпчэкитин бэлиэтээтэ. «Сахалыы куоластаан оонньуурбун астынабын. Көрөөччүлэргэ үөрүүнү уонна күлүүнү тиэрдээри гынабын», — диэн кини этэр.
Васильев Вася куоластааһынынан дьарыктанар. Кини Сочига, Москваҕа уонна Санкт-Петербурга элбэхтэ сылдьыбыт, конференцияҕа саха тылын туһунан кэпсээбит. «Көрөөччүлэр саха тылын таптыылларын, туруорууну өйдүүллэрин баҕарабын», — диэн Вася бэлиэтээтэ.
Попов Вася эмиэ куоластыыр уонна куукуланы салайар. «Сахалыы тылбытын сыаналаан саҕалыылларын баҕарабын», — диир кини.
Оҕолор кэнниттэн эбээлэр кэпсээтилэр. 4 «А» кылаас эбээлэрэ оҕолорун кытта тэҥҥэ үлэлииллэр уонна бары куукулалары бэйэлэрэ оҥорбуттар. Кинилэр Ф. И. Авдеева аатынан Оҕо айымньытын дыбарыаһын учууталларын кытта бииргэ үлэлээн, оҕолорго араас творческай бырайыактары оҥороллор. «Биһиги бастаан куукулалары иистээн-тигэн саҕалаабыппыт. Ол кэнниттэн кукольнай театры, таҥастары оҥорбуппут. Оҕолор спектакль нөҥүө культураларын билсэллэр, бэйэлэрин көрдөрөн үөрэнэллэр. Оттон биһиги, эбээлэр, оскуола олоҕор наадалаахпытын эрэллээхтик ылынабыт», — диэн кэпсииллэр эбээлэр. Кинилэр кылаас эбээлэрин түмсүүтүн тэрийбиттэр. Оскуолаҕа кэлэн оҕолору өйүүллэр, аһаталлар, тэрээһиннэргэ кытталлар. Атын эбээлэр атын оскуолаларга бу курдук түмсүүнү холобур оҥостоллорун туһунан кэпсэтии барар үһү.
Кылаас салайааччыта Семёнова Ольга Дмитриевна кэпсээнинэн, оҕолор начальнай кылаастан ыла фольклор куруһуогун кытта үлэлии сылдьаллар. Ермолаева Екатерина Егоровна көмөтүнэн оҕолор норуот оонньууларын, ааҕыыларын, ырыаларын үөрэппиттэр, онтон кэлин кукольнай театры тэрийбиттэр. «Оҕолор спектакль нөҥүө сахалыы саҥарарга үөрэнэллэр, интонацияны иэйэн билэллэр, төрөөбүт историяларын өйдүүллэр», — диэн бэлиэтээтэ Ольга Дмитриевна.
Сценарийдары суруйар, оруоллары үллэстэр — Ермолаева Екатерина Егоровна, Ф. И. Авдеев аатынан Оҕо айымньытын дыбарыаһын фольклор уонна сахалыы саҥарар тыл куруһуогун салайааччыта. Кини 4 «А» кылааһы кытта холбоһон үлэлиир, оҕолорго норуот тылын-өһүн, фольклору чугастык билсэллэригэр көмөлөһөр.
Куукулалар уонна декорациялар чааһынан көмөлөһөр — Захарова Наталья Николаевна, Ф. И. Авдеев аатынан Оҕо айымньытын дыбарыаһын уруһуй куруһуогун салайааччыта. Кини куукулалары киэргэтэр уонна кинилэри гримниир.
Кинилэр бу спектакль бэйэлэрин бастакы улахан туруоруулара буолбутун бэлиэтээтилэр. Салгыы тэрийэр-көмөлөһөр үлэлэрин кэҥэтэн, атын да кылаастардыын үлэлэһэн спектакль туруорар былааннаахтар.
Власова Нина Викторовна уонна Таманнырова Евгения Анатольевна «Орлята России» хамсааһынын туһунан кэпсээтилэр. 31-с оскуола бу хамсааһыҥҥа өрөспүүбүлүкэҕэ биир бастыҥ буолар. «Бүгүҥҥү тэрээһин — саха кылаастарын көрдөрүүтэ, 4-с кылаас бүтэрин бэлиэтээһинэ. Бары кыттыылаахтар: оҕолор, эбээлэр, төрөппүттэр», — диэн этэллэр кинилэр. Билигин «Орлёнок-родитель» диэн саҥа хайысханы үлэлэтэн эрэллэр уонна маннык түмсүүлэр оскуола олоҕор наһаа наадаларын бэлиэтээтилэр.
Спектакль Култуура сылын чэрчитинэн тэрилиннэ уонна оҕо, эбээ, төрөппүт, учуутал биир сомоҕо буолуутун холобура буолла. Бу курдук түмсүүлэр оҕолор бэйэлэрин култуураларын билэр, төрөөбүт тылларын таптыыр, улахан дьону ытыктыыр киһилии майгылаах буолан улааталларыгар көмөлөһөллөр.