Тохсунньу 24 күнүгэр Лөгөй лиссиэй-интэринээтин «Сайдам» оскуола тыйаатыра П.А Ойуунускай аатынан Саха академическай тыйаатырыгар Н.Д Неустроев «Тиэтэйбит» комедиятын көрөн дуоһуйдубут уонна эбии уопут ыллыбыт. Биһигини Москватааҕы М.С. Щепкин аатынан театральнай училищены бүтэрбит эдэр артыыстар Ньургуйаана Шадрина уонна оскуолабыт выпускнига Петр Домотов көрсөннөр, тыйаатыр историятын кэпсиир түмэли, тыйаатыр гримеркаларын, иистэнэр сыахтарын, декорацияны оҥорор мастарыскыайдары, туох ханна хайдах үлэлиирин көрдөрөн, кэпсээн сүрдээх интэриэһинэй экскурсияны тэрийбиттэрин астынныбыт. Биһиги тыйаатыр сүрүн режиссерын Руслан Тараховскайы кытта үлэлиир кабинетыгар көрсүһүүбүт саамай долгутуулаах этэ. Кини хайдах үлэлиирин билиһиннэрдэ, кабинетыгар баар сэдэх экспонаттар баалларын кэпсээтэ.
Тыйаатырга сылдьан, сахалыы сериаллар, киинэлэр артыыстарын илэ харахпытынан көрөн, көрсөн үөрүүбүт үгүс. Оҕолор үксүбүт Саха тыйаатыра туруорбут испэктээки көрө илик буоламмыт, артыыстар хайдах саҥаралларын-иҥэрэллэрин, тутталларын-хапталларын, артыыстыылларын көрөн, бэйэбит сыанаҕа хайдах оонньуурга элбэҕи билэн, харахпыт уота өссө сандаарда! Түгэнинэн туһанан, биһиги салайааччыбытыгар, куруутун сүбэ-ама буолар учууталбытыгар Татьяна Михайловна Петуховаҕа махталбытын биллэрэбит!
Янис СЫСОЛЯТИН, VIII кылаас
Лөгөй лиссиэй-интэринээт, Уус Алдан