Билим дьоҕус академиятыгар оскуола үөрэнээччилэрэ Саҥа дьыллааҕы утренникка эмиэ кэлэллэр. Ахсынньы 18 күнүгэр өрөспүүбүлүкэ алын сүһүөх үөрэнээччилэригэр күүтүүлээх күннэрэ тосхойдо!
Маҥнай оҕолор Саҥа дьыллааҕы квест-оонньууну аастылар. Сорох оҕолор саҥа бастакытын кэлбит буолан, оонньуу сылдьан бэйэ-бэйэлэрин кытары билсэн доҕордостулар. Квест-оонньуу оҕолор билиилэрин туругурдан көрдө уонна сүрүнэ — сомоҕолоото.
Онтон киэһэ өттүгэр оҕо эрэ барыта сөбүлүүр «Гарри Поттер» киинэтин тиэмэтинэн дьүһүйүү буолла. Хас биирдии персонаж киинэттэн эрэ түспүт курдук оонньоото, киинэ сюжетыттан тэйбэккэ, олус үчүгэйдик оонньоон көрдөрдүлэр. Хайа эрэ түгэҥҥэ бэйэм киинэни көрө олорор курдук сананным.
Бу кэннэ күүтүүлээх ыалдьыттар Тымныы оҕонньор сиэнин Хаарчаананы кытта кэлэн симэммит Харыйа уотун умаппыттара. Ол кэннэ оҕолорго Саҥа дьыллааҕы бэлэхтэри түҥэттилэр. Онтон киэһэ оҕолорго аналлаах үҥкүү буолла.
Бу курдук мин Билим дьоҕус академиятын дьиэтигэр аан бастакы Саҥа дьыллааҕы тэрээһиҥҥэ сылдьан олус диэн үөрдүм. Уонна саамай үөрэ көрбүтүм — бу дьиэҕэ атын-атын оройуон оҕолоро кэлэн түмсүүлээх буоларга үөрэнэллэр эбит.
Вова ПОПОВ,
Кустуур орто оскуолатын 10 кылааһын үөрэнээччитэ,
«Биракчаан» медиа-киин юнкора.
keskil14.ru