Саха гимназията Сомоҕолоһуу күнүн көрсө аҕалар уолаттарын кытта 40-ча буолан муҥхалаатыбыт. Мин муҥхаҕа аан бастакыбын сырыттым.
Каникул кэмигэр биһиги оскуолаҕа биллэрии тахсыбыт этэ: Егор Егорович Жерготов, Степан Олегович Ноев уонна Аҕа сүбэтэ салайыыларынан муҥхалыы барааһын туһунан. Оскуолаҕа оҕолор, аҕалар мустаммыт 10 массыына буоламмыт айаннаатыбыт. Намсыркай тракт күөлүгэр икки чааһы быһа айаннаан тиийбиппит. Алгысчыт Кымыс Байбал аал уоту алаадьыннан аһаппыта, биэлэрин кымыһынан күндүлээбитэ. Кымыс Байбал күөлгэ ханан элбэх балыктааҕын, муҥха түһэр сирин көрбүтэ. Онтон аҕалар анньыыннан мууһу алдьатан барбыттара.
Нырыы, ыт маһын ойууртан аҕаларбыт сүгэннэн быһан аҕалбыттара. Күөлү төгүрүйэргэ туһалаах мастар. Ыт маһын ойбон саҕаланыытыгар түһэрэн баран, кыра-кыра ойбоннорго хабан ыла-ыла муҥханы күөл устун муус аннынан ыыппыттара. Ол кэнниттэн нырыы маһынан собону оҕолор үргүппүппүт. Дьэ, онтон муҥханы бүтэһигэр тардыбыппыт. Муҥха ийэтигэр сэттэ балыгы хаппыппыт. Байанай бэрсэр-бэрсибэт түгэннэрдээх эбит. Аныгыс сырыыга элбэх бплыгы бултуйуохпут диэн эрэллээхпит. Үүтээммитигэр кэлэн Егор Егорович викторина ыыппыта оҕолорго. Муҥха чаастарын, ханнык саҥа тыллары билбиппитин, мин онно бастакы миэстэни ылбытым. Сүрдээҕин үөрбүтүм. Өбүгэлэрим хайдах тыыннаах хаалар туһугар үлэлээбиттэрин эппинэн-хааммынан биллим.
Роберт Николаев, 3 «В» кылаас үөрэнээччитэ Саха гимназията, Дьокуускай куорат