Эбээн-Бытантай улууһун Кустуур нэһилиэгэр бу күһүн саҥа талыллыбыт баһылыгы Константин Иванович Старостины кытары эдэр кэрэспэдьиэннэр көрүстүбүт. Саҥа баһылыкпыт хайдах үлэтин саҕалаан эрэрин билээри уонна олох-дьаһах кэккэ ыйытыыларыгар хоруйдууругар көрдөстүбүт.
— Үтүө күнүнэн! Константин Иванович, элбэх куолаһы куоһаран кыайыыгынан эҕэрдэлиибит! Үлэҕитин хайдах-туох саҕалаатыгыт?
— Бастатан туран, миигин олус күүстээх быыбарга үс кандидаттан талан ыллылар. Онон этэн тураммын, нэһилиэк баһылыга буоламмын, бэйэм төрөөбүт-улааппыт, оҕо сааһым ааспыт сиригэр кэлэммин, Кустуурбун өрө тардыам диэммин бэйэбэр сыал туруоруммутум.
— Кыстыкка бэлэмнэнии туруга хайдаҕый?
— Кыстыкка бэлэмнэнии диэн эттэххэ, кырдьык, олох уустук. Быйыл от оттооһунугар сүрдээх ыарахан дьыл буолла. Ол курдук сайыны быһа ардах түһэн уонна тымныы буолан, от ууга барда, үчүгэйдик үүммэтэ. Итинник ыарахаттары көрсөн олоробут. Улахан субэ мунньаҕынан улууска ыксаллаах быһыы-майгы балаһыанньата биллэриллэн, өрөспүүбүлүкэҕэ сурук ыыппыппыт тиийэн, онно үлэ бара турар.
— Оччоҕо оттооһун түмүгэ нэһилиэккэ хайдаҕый?
— Быйылгы от сезоныгар биһиги «Саха ынах» диэн тэрилтэлээхпит. Бу тэрилтэ 148 т от бэлэмнээн олорор, онтон чааһынай хаһаайыстыбалары ылар эбит буоллахпытына, 52 т оту оттоотулар. Ол тиийбэт. Саха ынаҕар уопсайа — 161 төбөлөөхпүт, ол иһигэр 35 ыанар ынах. Онтон чааһынай секторга 83 төбө баар. От тиэйиитигэр улахан болҕомто ууруохха наада.
Билигин саамай тыын боппуруоспут — от тиэйиитэ. Ити «Саха ынах» тэрилтэтигэр соҕуруу улуустартан от ылан, былааннаах олоробут. Итиннэ «Саха ынаҕа» тэрилтэтэ ыкса сибээстээх, улуус тэҥҥэ үлэлэһэн, номнуо тиэйэн аҕалар (поставщигы) тэрилтэни булан олоробут. 260 т от кэлиэх курдук буолла, ону улуус баһылыга бэйэтин үбүттэн (бюджетыттан) уйунар.
— Онтон каадырынан хааччыллыы хайдаҕый?
— Каадырдар тиийэллэр, олохтоохторбут үлэ миэстэтигэр бааллар.
— Эдэр ыаллары, специалистары өйүүр ханнык бырагыраамалар баалларый?
— «Эдэр ыал» бырагыраамаҕа урут-уруккуттан олохтоох дьаһалта утары баран, биир кэмнээх материальнай көмөнү оҥорор этибит. Билигин үп-харчы кырыымчыгынан, ыстатыйаларбытыгар харчы суоҕунан сибээстээн, ити көмөлөр тохтуур курдук буоллулар. Олохтоох дьаһалта бюджетыттан, 2015-2020 сс. үлэлиир кэмнэрбэр, 350 тыһ. солк. биир ыалга көрөр этибит. Биһиги нэһилиэктэн түөрт ыал сылга ылар этэ. Ити бырагыраама өрөспүүбүлүкэ, оройуон, олохтоох дьаһалта бииргэ үбүлээһинин нөҥүө барар этэ. Эдэр специалистарга «Моя Якутия в 21 веке» диэн тэрилтэни кытта үлэлээммит, биһиги 2014 сылга дьиэ докумуонун экспертизатын ааһан, туох баар докумуоннарын тиһигэр ситэрэн баран, бу нэһилиэкпитигэр бастакы толору хааччыллыылаах дьиэ тутуута үлэтин саҕалаан эрэр. Түөрт квартираҕа учууталлар, быраастар олороллор. Онон дьиэнэн хааччыллыы үчүгэй диэххэ сөп.
— Константин Иванович, инники былааннарыҥ?
— Ханнык баҕарар нэһилиэккэ кэккэ кыһалҕалар бааллар. Ол кыһалҕалары туоруурга туох баар күүспүтүнэн ылсаммыт уонна бары биир санааҕа кэлэн үлэлээтэхпитинэ эрэ, үлэ тахсыылаах буоларыгар эрэллээхпин.
Сиһилии баһылыктыын сэһэргэһиибитин видеоҕа көрүҥ:
Кэпсэттэ Стас Попов, 8 кылаас үөрэнээччитэ.
Видеограф Тапталыына Рожина, 10 кылаас үөрэнээччитэ.
Кустуур орто оскуолата, «Биракчаан» медиакиин.
keskil14.ru