Лөгөй орто оскуолатын 50 сыл анараа өттүгэр олох киэҥ аартыгар үктэммит оҕолор быйыл номнуо оскуоланы бүтэрбиттэрэ кыһыл көмүс үбүлүөйдээх 50 сыллара буолар. Ол курдук, Лөгөй орто оскуолатын 1975 сыллаахха бүтэрбит 50 выпускниктара Лөгөй лицей-интернатыгар үөрэммит кыһаларыгар махтанан туран бэлэх ууннулар.
Лиссиэйбит киэҥ тэлгэһитигэр кэрэ көстүүлээх беседка тутан бэлэх биэрдилэр. Беседка ааптара Алексей Прокопьевич Самсонов буолар. Үөрүүлээх арыллыыта бэс ыйын 28 күнүгэр буолан ааста, бу күн выпускниктар олус истиҥник оскуола кэмнэрин ахтан-санаан аастылар. Ол курдук, выпускниктар ыллам ырыаларынан эҕэрдэ ууннулар, баяҥҥа доҕуһуоллаата Иннокентьий Попов.
Үөрүүлээх быһыыга майгыга кыһыл лентаны быстылар лиссиэй дириэктэрэ Михаил Петрович Пухов, лиссиэй 2025 сыллаах выпускниктара Антон Тищенко, Дарина Бурнашева уонна беседка ааптара Алексей Прокопьевич Самсонов. Бу күн элбэх эҕэрдэ, махтал суруктар туттарыннылар. Улахан махталбытын биллэрэбит 1975 сыллаах Лөгөй орто оскуолатын выпускниктарыгар!
Янис СЫСОЛЯТИН «SiTiM LegMedia» юнкора