Ытык Тааттабытыгар XXII «Манчаары оонньуулара» үрдүк тэрээһиннээхтик ыытыллан түмүктэнэн эрэр. Түөрт сылга биирдэ ыытыллар Саха сирин олимпиадатынан биллэр успуорт улахан түһүлгэтигэр Арассыыйа успуордун министиэристибэтин физическай култуура уонна маассабай успуорт Департаменын дириэктэрэ Максим Сергеевич Уразов ыалдьыттаата.
Кини: «Арассыыйа курдук үгүс омук түмсэн олорор сиригэр күрэс төрүт көрүҥнэрэ сайдыахтаахтар», – диэн эттэ уонна биһиги Тааттабытыгар олоххо киирбит аан дойду таһымнаах спортивнай эбийиэктэргэ улахан күрэхтэһиилэр ыытылла туруохтара диэн эрэлин биллэрдэ. Арассыыйа норуоттарын төрүт үгэстэрэ Арассыыйаны түмэр, сомоҕолуур күүстээхтэрин туһунан ытык Таатта сиригэр туран эттэ уонна саха норуота төрүт үгэстэри харыстаан илдьэ сылдьарыгар улахан махталын биллэрдэ.
Максим Сергеевич этиитин Таатта дьоно киэн тутта иһиттибит. Биһиги төрөөбүт дойдубут Арассыыйа сайдыытыгар киллэрэр кылаатын бу күннэргэ чугастык ылынан өйдөөтүбүт.
Улууспут баһылыга, анал байыаннай дьайыылар бэтэрээнэ Айаал Семенович Бурцев: «Манчаары оонньууларын» тэрээһинин үлэтин Саха өрөспүүбүлүкэтин салалтата, Таатта улууһа Ил Дархан Айсен Сергеевич Николаев тус хонтуруолунан ыытта. Бары бииргэ сомоҕолоһон, күүстээх үлэни ыыттыбыт», – диэн эттэ уонна Таатта улууһун олохтоохторугар, улуус нэһилиэктэрин баһылыктарыгар, тэрилтэ салайааччыларыгар, «Таатта» түмсүү салайааччытыгар Владимир Аржаковка, өрөспүүбүлүкэ улуустарын баһылыктарыгар, ыаллыы сытар Чурапчы улууһун дьонугар, улуус баһылыгар Степан Анатольевич Саргыдаевка дириҥ махталын биллэрдэ.
Алта күн устата Таатта улууһа успуорт улахан түһүлгэтинэн буолан, 1,5 тыһыынча күрэстэһээччини түмтэ.
Алексей САВВИН, IX кылаас, А.Е. Мординов аатынан Таатта лиссиэйэ,
«Кэскил»оҕо пресс-киинин эдкора
Андрей Сорокин хаартыската, СИА